Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die stede van Harderwijc in Ghelrelant verbrande.
Dat XXV capitel.

Opten lesten dach van julio doen was tot Harderwijc een alten groten lastigen brant, diewelke began des middages; ende in den tijt van III uren verbrande die hele stede, datter niet en bleven staen boven V of VI husen. Diewelcke nochtans een harde stede ende die husen wel gedect mit pannen ende hertdac. Ende overmits dat den brant so haestlic toeghinc, so en wist dat volc hem nyewerts bet te bergen dan in kelders ende fauten, die nochtans al versmoerden ende branden. Ende oec so lieten si haer kinder mit groter menichten in die prochyekerc lopen om hem daer te bergen; ende daer liep groot volc bi, die altesamen verbranden. Ende die straten en waren nyet al te wijt, ende waren so heet van den brande, datter niemant op gaen en mocht. Ende daer viel oec veel volcs doot onder die gevelen ende muren van den husen. Die clocken in den toern verbranden, mer dye toern bleef staen. Ende daer verbrande alten swaren goet, overmits die cortheit van tide, want nyemant tijt en hadde om enich goet te vluchten; ende mede waren daer grote goeden gevlucht van die dorpen ende van der Velue, die al verbranden. Ende in der stede was een scoen minrebroeders cloester van den Gaudenten, dwelck altesamen verbrande; ende desgelijcs een scoen suster cloester, datter niet en bleef staen, sodat die scade ontsprekeliken was, die daer in so corter tijt gesciede; dwelc beclaechlic was. Ende dat alremeeste ende dye meeste scade was om te beclagen, dat waren de kerstenmenschen, die so deerlic ende jammerlic versmoerden ende verbranden; wantter wel omtrent XV C versmoert ende verbrant lagen, jonc ende out, dat deerlic om sien was ( God ontferme de sielen. Ende die na den brande binnen die stede quamen, seyden dat nye mensche deerliker destructie ghesien en hadden, noch sien en mochte, want men doer die straten niet gaen en mochte, overmits die gevelen ende muren, die nedergestort lagen, waeronder dat een grote menichte van volc versmoert ende verbrant lach.

In deser selver tijt verbarnden tot Gorichom boven die CC huysen, ende oeck mede tot Belle in West-Vlaenderen verbranden doen wel CCCCC huysen.

Opten XXVI dach van december wert tot Haerlem gegoten een grote vierclocke, ende was genoemt Roelant die Grote, ende wert

[p. 425r]

in den toern gehangen boven opter kercken, mer wert namaels ofgebroken om der groter swaerten willen, als voorseyt is. Ende dese clocke was XI M⁴⁷² pont swaer of weynich min, ende was gegoten na der formen ende grote als die vierclocke binnen Ghent.

472 Aldus C; XI ½ AB.