Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Cleefse den hertoge van Ghelre ter neder togen voer Huyssen ende van enen groten opwater.
Dat XXIIII capitel.

Also dat oerloge noch hanghende bleef tusschen den Ghelressen ende Cleefsen, so toonde elc sijn macht daer hi mocht. So hadden die Ghelressen op dese tijt belegen mit heercracht dat steetken van Huyssen gelegen opten Rijn, ende bestormden dat dicwils dach ende nacht, dat den ingeseten seer moeylic viel, ende weerden hem nochtans seer, ende keerden die Ghelressen vromelic of. So hebben hem die Cleefse bereyt mit groter macht ende quamen den Rijn neder mit veel gereetscap ende instrumenten omme die stede te ontsetten. Ende comende omtrent die stede, worden si hantsgemeen, ende sloegen malcanderen mit allen seer; mer int eynde behielden die Cleefse doverhant, ende daer werter veel van den Ghelressen geslegen ende gevangen. Ende dye hertoge, die selver int velt ende int voerste van den stride was, is mit nauwer listen weder over Rijn gecomen, afterlatende alle hoer artelrien van bussen ende andere instrumenten, die welcke die van Huyssen binnen

[p. 424v]

haer stede haelden; ende die Cleefse versagen dye stede mit vitaelge ende anders dat hem van node was, ende togen mit groter victorien ende loven weder thuys.

In dit jaer, op Sinte Gallus dach, wast een groot, swaer ende lastich storm uuten noortwesten, daer grote ende verderflijke scade dede an vele dyken in Hollant, als tot Medenblic, tot Muden, tot Amsterdamme ende tot Sparendamme, ende meer andere dyken in desen landen ende in anderen landen, die alten groten swaren goet weder costen te repareren ende te maken; mits diewelken groot water in den landen quam, omdat men so geringe niet weder diken en mocht. So bleeft die gehele winter lang ryen, ende sonderlinge als die wint ant noorden was, dattet nyet anders en sceen te wesen dan een volle zee; sodat mitsdien veel waters in den landen quam, dat den luyden groot scade deden, als men wel dencken mach.

Opten XXIII dach in junio quam tot Santvoert een visch an lande, die wel L goede mannen voeten lang was. Ende opten lesten dach van december quammer weder een an tusschen Santvoert ende die Heyde, lanc wesende XXV voeten.

In dit jaer van XV C ende II wert begonnen die stenen toorne te maken op Sinte Bavenkerck binnen Haerlem; ende in den jare van XV C ende XV wert dieselve toorne weder of gebroken, want die kercke den last niet dragen en mochte; mits diewelcken vele verloren costen ghedaen worden.

Int jaer XV C ende III, doen wast alten couden nawinter, wanttet stont te vriesen int leste van februario, ende het viel veel sneeus. Ende int beghinsel van maert snudet ende vroert noch harder, so dat men mit sleden noch liep tusscen Haerlem ende Amsterdamme over ijs. Ende dit geduerde III weken. Ende oude luden seyden, dat si alsulken coude omtrent dye tijt nye gesien noch beleeft en hadden, na dyen datter gheen out ijs en lach int water.