Van een wonderlic visioen dat binnen der stede van der Goude gheboerde, ende hoe vrouwe Margriete, die oude princesse, oflivich worde.
Dat XXVI capitel.
In ditselfde jaer geboerde een alten wonderlicken ding binnen der stede van der Goude, ende geschiede in een cloester genoemt tot Sinte Marie Magdalenen; want die duvel quam binnen denselven convente, ende versciep hem dicwils bi sconen dage onder die susteren; alsnu quam hi als een scoen jongelinc, ende taste biwilen der susteren borsten ende greep se in den arm, ende bedreef veel wonderliker manieren; ende bi wilen quam hi als een beest, ende dede den susteren menigeGa naar voetnoot473 tribulacye ende vervaernisse, sodat sommige al bijster van sinnen worden; ende dit duerde menige tijt, sodat si grote abstinencye ende penitencye deden, ende gaven milde aelmissen. Ende overmits dese goede werken is dye duvel int eynde verdreven ende en quam nyet weder.
In desen tide sceyde van deser werlt dye edele, doechtlike vrouwe Margriete, wedue wilen hertoge Kaerls van Bourgondien, ende wert begraven int convent totten Minrebroederen tot Mechelen, die sere beclaecht wert van den armen ende sonderlinge religioesen personen, dien si als een goedertieren moeder bystont ende te hulpe quam, ende hadde menich clooster van mannen reformeert ende doen reformeren. Ende die beneficien ende collacien van provenen die si te presenteren hadde als int lant van Oest Voorne, Ten Briele, tot Denremonde, tot Oudenaerden ende elders, die en gaf se niet onnutte ende onbequamen personen als andere collatoers uut gonsten oft beden geveynsdelic doen, mer si versach daermede geleerde mannen van eerbaren leven, sonderlinge arme priesters ende clercken dye in theologye, dats in der Heiliger Scriften studeren; ende als si yemandts presenteerde oft collacie gaf van prochykercken, die mosten selver in personen resideren ende op hoer kercken woenen.
Omtrent dese tijt, in die Oestmaent, waren die hoge heemraets van Uutrecht ghetogen om te scouwen die Leckdijc; ende si waren V rijcke, eerbare mannen; ende waren verspijt ende verlaecht van die Ghelres, die se gevangen namen, ende voerden se int lant van Ghelre, op thuys tot Hattem. Ende dit was omdat si een van des hertogen dyenres van Ghelre gerecht hadden mitten swaerde.
Int jaerGa naar voetnoot574 XV C ende IIII, int eerste van dye maerte, was een steenhouwers vrouwe binnen Deventer, die II kinderen baerde; ende waren beyde meyskens. Ende waren van den borst of neerwerts an malcanderen ghewassen, ende hadden een middel ende een buyc, mer II kunnen, twe hoefden, vier armen ende vier benen.
Auteursrechtelijk beschermd