haddet hem ofghelopen, overmits wantter sijn lant mede gestarct ende bescermt was. Aldus waren die van Groeninghen in meninghe den Damme te bestormen ende weder in te nemen. Ende hebben tot haren hulpe wel III M knechten gecregen, dwelke een vergaert volck was van Overlanders ende Nederlanders. Ende zijn mit dese knechten ende mit groter menichten van poorteren van der stat voir den Damme gereyst, nemende oec mit hem vele grote ende cleine bussen, engienen ende ander instrumenten ten orloge dienende. Die grave van Eemden die op dese coemst al versien was, hadde grote assistencie, hulp ende bistant van volc van wapenen gecregen van den biscop van Munster, van den hertoge van Bruynswijc ende van anderen heren ende princen dairomtrent geseten. Soe sijn dan dese twe teghen malcanderen ingetreden, ende dair gesciede enen bloedigen strijt, ende gingen malcander in den eersten al te grijslicken an, ende sloegen also vreeslicken, datter veel van den knechten in den eersten angange ende hetten geslagen worden, ende en namen niemant gevangen, sodatter wel boven die M knechten gheslagen worden, ende noch wel M van den poorteren van Groeningen so gevanghen, so geslagen. Ende dye van Groeningen weken afterwerts, ende ruymden dat velt, ende die grave behilt de victorie. Terstont nadat dese scoffierichede ende nederlage van die van Groeningen gesciet was, heeft se de grave aftervolcht, ende heeft dye stat tot tween eynden belegen, an deen sijde int cloester tot Aedwerden, ende dander an dye watersijde. Ende dede twe grote, starcke blochusen opslaen om die stat mede te dwinghen.
Auteursrechtelijk beschermd