Hoe dat coninck Henric van Enghelant ende hertoghe Philips van Bourgondien, te samen quamen buten Calys.
Dat XXI capitel.
Int selfde jaer van XV C, omtrent Pijnster, is die coninc Henric van Enghelant die VII mit sine coninginne, mit vele heren ende princen ende edelen van mannen ende vrouwen over zee gecomen tot Calijs. Ende op die tijt was die aertshertoge Philips van Oestenrijck, van Bourgondien, etcetera, tot Sinte Omaers, dair hy noch nye gheweest en hadde, ende wert dair op dat passe seer feestlic ontfangen ende gehult. Also datter een dach geraemt wert tusscen den coninck ende den hertoghe om by malcanderen te comen, dwelck alsoe ghesciede, buten dye stadt van Calijs, op een plecke ghenoemt Tot Sinte Peters, mit cleyne menichte van volcke; want dye stadt van Calijs wert vast toeghesloten datter nyement uut en mochte; ende voirt, dat meeste volck dat si beyde hadden, moste een groot stucke weghes vandane bliven, also dat si nyet by hem en hadden, dan elcx van zommighe hair meeste heren ende edelinghen. Ende hyer was die coninginne by mit hair vrouwen ende jonffrouwen, ende waren een lange tijt bieen, bancketerende, hoverende, dansende ende veel solaes bedrivende. Ende die coninck ende die hertoghe hadden onderlinge vele raets ende woorden int secreet. Ende daerna sijn si minlick ende vriendelick vaneengesceyden, oerlof nemende an malcanderen. Ende elck is weder gereyst vandaen si gecomen waren, dair grote blijsscap om was.
In den herfst int selfde jaer waren zommighe poorteren binnen der stede van Dordrecht ghevanghen. Dye sake wairomme was, als dat si een meuterye onderlinghe hadden ghemaect ende enen anslach, dye langhe ghestaen hadde, omme dye stadt van binnen te verraden. Ende dit wert int heymelyck vernomen, als datter vijf totter justicien gheset worden, ende werden mitten swaerde gherecht.
Auteursrechtelijk beschermd