Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Oest-Vriesen weder rebelleerden ter cause van der groter scattingen tegen den hertoghe van Zassen ende hoe si dat starcke blochuys tot Sloten wonnen ende destrueerden.
Dat XIX capitel.

Na den male dat dye hertoghe van Zassen in Oest-Vrieslant gehult ende ontfangen was voir enen heer, als voirseyt is, soe is hi cortelic dairna weder int lant van Zassen ghereyst. Mer hi liet dair bliven sinen soen hertoghe Henrick als gonvernuer ende capiteyn, om steden ende sloten te bewaren teghen den oploep ende rebellicheit der Vriesen. Onlancxs hierna, omtrent meye, int jaer van XV C, maecten die Vriesen weder een opstal, ende worden weder rebellerende ter cause van der groter exactien ende scattingen die dair in den landen ghedaen ende ghenomen worden; ende was so groot ende onmatelic, dat nye desgelijcs in Vrieslant gesciet oft genomen hadde gheweest. Ende dese commocie ende oploep gescyede alreeerst binnen der stede van Bolswert, dair op die tijt cappiteynen mit veel knechten inne gecomen waren om die exactien ende scattingen te ontfangen; wairuut die van Bolswert int harnas liepen, ende bestonden crachtelicken op desen knechten te slaen, soedatter veel in hetten dootgeslagen worden, ende veel liepender uuter stat, die ontcomen conden. Dese mare int lant comende, wert dat hele lant rebel, ende vergaerden alle de lantluden dair omtrent geseten, wel starc wesende omtrent XX M man, ende waren geheel ontsint ende verwoet, dat men se dus travilgeren ende scatten woude; ende sijn mit gansser macht gestreken na tblochuys tot Sloten. Dwelc die hertoghe van Zassen dair ende tot Lewerden hadde doen opslaen tot defensie van hemselven ende den lande van Vrieslant, verduchtende altijt dat si rebelleren ende tegen hem opstaen souden, ende meende mit desen blochusen dat hele lant te dwinghen. In deser manieren toghen si eerst voor Sloten, omme dat in te crighen, wanttet naest die zee lach om dair lichtelic te havenen ende leggen in die stede, ende cregen mit subtijlheden ende cloucheyt ghevanghen een van

[p. 422r]

den capiteinen mit sommighe knechten; ende dair werter oeck een deel gheslaghen, ende veel ghequest, soe datter boven XIIII knechten op tblochuys niet ghebleven en waren. Ende als si die grote menichte van den Vriesen saghen, die teghen hem dair voir tblochuys lagen, ende si so luttel ende weynich waren, gaven si hem op ende behouden lijf ende goet, ende dat tot horen live behoerde, ende ghinghen ongescent van tblochuys; ende die Vriesen sijn dairinne ghetoghen ende hebbent ofghebroken ende destrueert, slecht makende neffens der aerden. Ende dit gesciet wesende, togen si voirt voir de stat van Fraenken, daer een starc slot binnen lach, dair hertoge Henric op die tijt op lach, mit veel knechten, ende hebben dat slot so vast ende starc belegen, datter niemant in noch uut en mochte. Mer in de stadt hadde hy veel knechten legghen, die al by wylen uutquamen; ende hadden veel scermutsinghen teghen dye Vriesen. Ende deden groote scade int heer, vanghende ende slaende, so datter veel doot bleven an beyden sijden. Ende dit grote volc van den Vriesen hebben aldus tsconste van dye zomertijt int velt gheleghen, sonder yet te bedriven den orloghe angaende dat scrivens waert is.

Opten X dach in julio was alten lastigen brandt binnen die stadt van Monickendamme, want die hele stat verbrande van hair selfs vier, datter niet meer dan omtrent LXXX husen by dye kercke bleven staen, mit dye kercke, dair alten swaren goet van coern ende andere goeden inne verbranden.

Dairna XIIII daghen in julio quam tot Santvoert een visch an, die wel XXIIII voet lang was.