Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe datter een orloge op geresen is tusschen den hertoge van Cleve ende den biscop van Uutrecht.
Dat XVIII capitel.

Onlancxs hierna isser een quaet, fel orloghe opghestaen tusschen den hertoge van Cleve ende den biscop van Uutrecht; mer en duerde niet langhe. Die sake ende oerspronc wairom was dese: In voirleden tijden, doen die hertoge van Oestenrijc, Maximiliaen, int jaer van LXXXIII, die stat van Uutrecht beleghen had, doen hadden die van Uutrecht mit dat Nedersticht joncheer Engelbrecht van Cleve, des hertoghen broeder van Cleve, gecoren ende genomen tot enen voecht ende momber des Stichts, als dat, mits desen, dye hertoge van Cleve der stadt van Uutrecht bistant ende hulpe dede mit een grote zomme van penningen; ende hy en konde an sijn penningen niet geraken, ende dede die van Uutrecht dicwils vermanen mit boden ende scriften, om sine penningen te hebben ende ontfangen, naer inhout der brieven, die die stat van Uutrecht hem dairof ghegeven hadden. Mer dair en quam niet of. Als nu die hertoge van Cleve sach dat hem die tijt diende ende raet om knechten wiste, heeft hi al die knechten van der Groter Gaerden, die dair bi hem waren, weder in zoudije ghenomen, ende sant die int Sticht van Uutrecht, om enighe stede oft fortressen te becrachtigen ende inne te crigen, omme doir dyen die van Uutrecht te bedwingen tot sijnder restitucie ende betalinge te brengen. Soe zijn dan dese knechten gecomen opten VIII dach in julio, int jaer van XCIX, voir die stat van Renen, ende vielen al gelic voor die stat, ende hebben se mit groter macht assaulleert ende bestormt; mer si worden twemael vromelicken van den

[p. 421v]

ingeseten ofgekeert ende gheslagen, datter vast doden ende gequesten waren. Mer de knechten, die seer gijerich ende begeerlic waren om die stat te winnen, en lieten niet of ende die stat ten derdemael bestormt, ende sijnder mit cracht ende gewelt inne gecomen, ende sloegent al doot dat si werender hant vonden, ende creghen ende hebbender veel gevangen ende groot goet ofgescat. Die stat van Renen gewonnen hebbende, deden si die wel naerstelick bewaren, ende sijn voirt mit alle hoir macht getogen voir dye stat van Uutrecht. Ende beleyden dye poorten tot allen eynden, datter niemant in noch uut en mochten, ende hebben veel quaets voir de stat ende dair omtrent gedaen. Ende hebben veel dorpen ende woningen verbrandet, gerooft, pilgeert ende ghenomen, die beesten ende anders wat si crighen conden omtrent die stat. Ende waren oec veel beesten in Hollant ghevlucht, die si dairuut haelden ende vercoften se ende gaven goeden coop. Ende namen grote brantscattingen ende verdingen van den dorpen, ende bisonder van den cloesteren omtrent die stat, dair si groet⁴⁶⁷ swaer goet of cregen, ende hebben die Waert voir de stat oec gebrant, ende meest deel gescent. Ende lagen aldus een wijl tijts voir dye stat, of ende an reysende, ende togen ten lesten weder binnen der stat van Renen. Die biscop van Uutrecht, die wel wiste by sekere scriften ende boden dat de hertoge van Cleve hem dese knechten toegesonnen hadde, dair hem dese grote onverwinliken scade ende sinen Stichte of ghedaen was, heeft weder veel volcxs van wapenen vergadert, ende heeft dairenboven also mit dese Gairde ende knechten binnen Renen legghende tracteert ende gesproken, dat si den hertoge van Cleve ofgegaen sijn, ende hi heeft se in sinen zoudye weder ghecreghen, ende heeft se wederomme gesonnen int lant van Cleve om wrake te doen van den verlies, hinder ende scaden die hem binnen Renen ende in sijne Gestichte gedaen waren. Ende sijn mitten ghehelen hoop int lant van Cleve getogen, rovende, brandende ende vangende, veel grote, verderflicke scaden doende, ende namen oec sommighe plecken ende fortressen in, dair si groot scade uut deden in den lande. Mer onlancxs hierna is dit orloech in handen ghenomen, ende twert ghedadinct; mer hoe of in wat manieren is mi oncondich.

467 grore AB.