Hoe dat die Ghelressen een spronckreyse deden int lant van Cleve, ende hoe si van den heer van Yselstein ter neder ghetogen worden, ende hoe dattet gesoent wert.
Dat XVII capitel.
Omtrent Sinte Mathijs dach int jaer van XCIX, waren die Cleefse uutghetogen in den lande van Ghelre, ende hadden dat steetken van Dotekom belegen. Dit vernamen de Ghelresse, ende sonderlinge die van NymmaghenGa naar voetnoot464, ende maecten hem seer starck, bysonder mit veel poorters van der stat, ende namen al mede dat si crigen mochten, ende togen als si heymelixst mochten int lant van Cleve, stichtende roof ende brant, ende deden als hen dagelixs gedaen wert. Ende hadden een groten roof geplondert ende vergadert van koyen, ossen, paerden ende ander beesten, ende meenden dairmede thuyswert te trecken. Dit was int heymelick den heer van Yselsteyn verkondicht, die niet verde vandane en was, ende is van stonden an opgheseten ende nam al mede dat hi mochte ende crighen konden, ende is na desen Gelressen toegereyst. Ende hebben een passage ende een engen wech beleghen, dair si doirGa naar voetnoot465 passeren mosten, ende stelde hem dair neder om desen Gelressen te verlaghen ende den wech ende roof te benemen. Die Gelressen, die hier niet of en wisten, quamen mit horen rove andringhen, sonder enyge regele oft ordene te houden; ende die ander sprongen op uut hoir lagen ende ghingen den Gelressen vromelic te gemoet. Dair geviel een scarpe scermutsinge, sodatter an beyden sijden vast doden bleven, mer meest van den Gelressen. Ende int eynde namen die Ghelresse de vlucht, ende int vlien werter wel XV C ghevangenGa naar voetnoot466, daironder dat vele goede, eerbare poorters ende ambochtsluden van Nymmagen waren; ende mosten hemselven copen om grote zommen van penningen uuter vangenissen. Die hertoghe van Gelre anmerckende zijn verlies van zijn ondersaten ende ander scaden, heeft hem starck gemaect ende vergaederde een groot heer van knechten ende ander ondersaten, ende sijn weder in den lande van Cleve getogen, rovende, brandende ende veel scaden doende, ende cregen oeck veel gevangen, wairby die Cleefse veel goeder dorpen ofgebrant, gescat ende die lantluden gevanghen worden tot horen groten hinder ende scade. Mer bi middele van zommigen heren is dit orloge in handen genomen ende zijn verenicht an beyden sijden; mer hoe oft in wat manieren wert alleen onder tsecreet van den heren gehouden. Ende alle die knechten toghen wech uuten lande.
Auteursrechtelijk beschermd