Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Roomsche coninck nederquam om tlant van Gelre te winnen ende dattet gedadinct wert.
Dat XVI capitel.

Nadattet bestant tusschen den aertshertoge Philips ende tlant van Gelre uutgegaen was, is die Roomsche coninck van boven doir dye Eijffel tot Aken gecomen, ende hadde by hem den rijken hertoge Joriaen van Beyeren mit groot volc te paerde ende te voet, ende lach langhe tijt tot Antwerpen, vergarende meer volcxs, ende is mitten voorscreven hertoge van Beyeren, den hertoghe van Zassen, den hertoge van Gulic ende van den Berge, ende mitten hertoge van Cleve ende mit groot swair volc getogen int lant van Ghelre, om Kaerl van Egmont dairuut te verdriven ende dat lant onder sine ende sijns zoens subjectie te brenghen. Ende belagen een seer starc casteel, gelegen int dorp van Echte, ende bestormden dat dickwils, ende leden veel scaden dairvoir; ende wonnent ten lesten mit stormender hant. Ende die daerbinnen waren, toghen by nacht dairuut, ende ginghen dair selver in leggen. In derselver tijt wonnen si noch een cleyn steetken, genoemt Nuwestat, ende besaten dese II plecken. Dairnae toghen si voir die stat van Stralen ende belagen die mit groter cracht, ende scoten op dye stat mit groten hoeftsticken ende ander instrumenten, ende belasten dye stede seer ende laghen dair voir omtrent III weken. Mer ten lesten gaven si hem op, behouden lijf ende goet. Terwilen dat die hertoghe van Zassen ende die hertoge van Gulic voir Stralen lagen, togen die Gelressen uut mit groter macht, te paerde ende te voet, ende quamen int lant van Hensberch ende int lant van Moirse, van welcken landen die hertoge van Gulic een voecht ende bescermer was, ende stichten dair roof ende brant, ende namen veel gevangen mit hem, dair in lange tijden nye roef oft brant vereyscht en was. Corts dairna, opten XVIII dach van december, quam dye Roomsche coninck van neder uuten landen tot Coelen te pairde, overmits den oerloge van den Zwitsen tegen die Hoech-Duytsen, dat opgestaen was seer fellic. Die Zwitsen verdorven veel plaetsen, sloten ende fortressen in Duytsen⁴⁶¹ lande ende hadden tot diversen plecken veel van den Duytschen verslaghen. Ende op een tijt worden dair weder veel Zwitsen verslagen van die van der Groter Gairde van desen lande, die de Roomsce coninc gecregen hadde. Mer namaels werter een pays gemaect by middele van hertoge Lodewijc van Meylanen, die alsdoen in Duytschen lande gevlucht was. Hierna toghen die Gelressen voer Echte. Ende binnen Echte lagen CC pairden van des Roomschen conincs wegen, mit een capitein uut Henegouwen. Ende de Gelresse wonnen dat mit cracht ende die capitein wert gevangen, ende veel van den Walen worden verslagen, ende namen de paerden ende plonderden ende namen al dat si mit hem dragen mochten. Terstont dairna quamen die Gulickers ende verbranden dat dorp⁴⁶² ganselic of. Op dese tijt wonnen die voorscreven heren die die coninc dair gelaten hadden dat stedeken van⁴⁶³ Erclens, ende besetten dat. Ende want Kaerle van Egmont, dair dye hertoge van Bourbon oom of was, mitten coninc van Francrijc verbonden was, so sant hy hem te hulpe CCCCC glavien, costelic toegemaect, dairof de princepael capiteinen waren die bastert van Bourbon ende heer Robbrecht van Arenburch, heer van Hesden, ende quamen doir tlant van Ludic tot Remonde. Dit verhorende die voorscreven hertogen van Beyeren, Zassen, Cle-

461 Dnytsen AB.

462 doorp AB.

463 va AB.

[p. 421r]

ve ende Gulyck sceyden van dair. Mer dair wert tracteert dat die hertoge van Ghelre ende van Gulick bliven souden int segghen van den coninck van Francrijck, ende in persone bi den coninc compareren, also si deden.