Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat heer Frederic van Baden, biscop van Uutrecht, ter neder toech dye Grote Gaerde omtrent Deventer.
Dat XV capitel.

In desen jaer is de Grote Gaerde, omtrent IIII M starck wesende, gecomen omtrent dye stat van Deventer int Oversticht doir versoucken des joncheren van Witsch ende van Vossen, ende deden veel quaets int Oversticht van roven ende branden, den armen luden te vangen ende slaen. Want die joncheer van Witsch voorscreven een actie maecte van sekere resten ende achterwesen van lange jaren op de van Deventer. Die van Deventer lieten dit horen heer die biscop weten, dye van stonden an opgeseten is ende quam tot Deventer binnen, ende screef an den hertoge van Ghelre ende an ander sine vrienden, heren ende mannen, dat si hem assistencie ende hulpe doen wilden tot defencie zijnre stat van Deventer ende des lants van Overysel. Ende heeft terstont groot volck vergadert te paerde ende te voet, ende is desen knechten van der Gaerden te gemoete gegaen mitten hertoghe van Gelre dair in persone wesend, ende bevochten dese knechten vroemliken ende hadden veel do-

[p. 420v]

den an beyden sijden. Mer also de biscop vele reysigers hadde dye dat heer ende ordene doirbraken, sijn si vluchtich geworden ende de biscop hadde die victorie, ende vervolchden dese knechten starckelic, vanghende ende slaende. In dese sijde des Rijns werter veel gevangen, die tot Linnen, tot Berck, tot Oerdingen, tot Nuys, tot Tzoenst gevangen ingebrocht werden. Mer als de biscop van Coelen nederquam, most⁴⁶⁰ men die gevangen in alle sine landen uutlaten ende vry geven. Ende die van Deventer hadden meer dan C van dese knechten gevanghen, die si te samen lieten ter justicie setten, ende worden allegader onthoeft ende op raden geset omtrent dye stat, dair si den lantluden meest scaden gedaen hadden, dair dieselve lantluden seer behulpelic ende toe gheneycht waren.

Dese zomer van tjaer van XCVIII was dye scoenste, droechste zomer de yet veel geweest is, wanttet van dien zomer luttel of wenich regende. Nochtans so wast na gelegentheit van der droechte redeliken goeden tijt, ende dat gewas van veel vruchten mochte wel passeren.

460 s en t van most zijn licht beschadigd AB.