Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die Roemsce coninc sloech int graefscap van Bourgondien, ende hoe die pays van Zenlis vernyewet wert, ende hoe die coninc van Francrijc hertoghe Phillips beleende dat graefscap van Vlaenderen ende Artoys.
Dat XIII capitel.

Omtrent dese tijt heeft die Roemsche coninck Maximiliaen vergadert groot heer van volc van wapenen, by rade des heren van Vergy, ende is daermede ghetogen int graefscap van Bourgondien, doende daer vele scaden van roven ende branden; ende hem wert weinich wederstants gedaen. Ende sloech doen voert int hertoechdom van Bourgondien, dair hi oec vele scaden dede; mer daer wert hi van den Franchen capiteinen wederstaen, sodat si vele scermutsingen tesamen hadden.

[p. 419v]

Ende die Franchoysen gecregen dat casteel van Vergy, dair si vele Duytschen op vingen, ende voert meer andere plaetsen den here van Vergy toebehorende, ende bleven van den coninc confisceert. Als nu die coninc Lodewijc tot Reymen sacreert ende gewijt was tot enen coninc van Francrijc, so senden die coninc Ferdinant van Spangen ende van Aragon ende dye edele vorst, hertoge Phillips, aertshertoge van Oestenrijc, hertoge van Bourgondien, etcetera, ende die Venechianen, eerbare ende notabele ambassiaten tot Parijs bi den nyeuwen coninc, ende maecten pays ende aliancie mit hem. Ende van deser siden was daer here Engbert, grave van Nassouwen, die bi rade van den heren van den hove van Bourgondyen den pays, die wilen eer tot Zenlis gemaect was, liet vernyewen. Mer daer wert an gehangen om vreets willen, dat by den levende live van den coninc ende van hertoge Phillips geen mencye gedaen en soude worden van den hertoechdom van Bourgondien, etcetera. Om welken tractaet ende pays achtervolgende den tractaet van Zenlis te volbrengen, so wast geconcludeert ende gesloten dat die aertshertoge Philips tot in die cyte van Atrecht comen soude, ende aldaer homagye ende manschap doen van den lande van Vlaenderen, Artoys, etcetera, den cancellier van Francrijc, here Gwye van Rupenfort, in den name van den coninc Lodewijc, dat also geschiede. Ende daerna dede dyeselve cancellier homagye ende manscap uuten name van den coninc voornoemt hertoge Phillips van dat graefscap van Bolonien of Boenen, dat een leen is van dat graefscap van Artoys. Dit gedaen sijnde, dede die coninc weder overgeven den aertshertoghe Phillips die steden van Betunen, Aryen ende Heesdijn, also dat voersproken ende gesloten was.