Hoe dat hertoge Lodewijc van Orliens coninc van Francrijc gecroont wert, ende hoe die Spaensse pocken eerst int lant quamen, die men noemt Sint Jobs siecte.
Dat XII capitel.
Na die oflivicheit van coninc Kaerl die VIII, die in dit jaer van XCVII omtrent Palmen overleet, als voorscreven is, wert hertoge Lodewijc van Orliens ende van Valoys, wiens oudevader was een broeder van coninc Kaerl die VI, in de stat van Ryemen gesacreert ende gesalvet tot enen coninc van Francrijc, int jaer van XCVIII, na Paesschen, ende was den overleden coninc Kaerle bestaende in dye vierde graet, ende en was op die tijt geen naerder man persoen van bloede dan dese Lodewijc. Dese coninc Lodewijc die XII van dier namen, jonck sijnde, hadde getrout vrouwe JohanneGa naar voetnoot458, coninc Lodewijcs die XIGa naar voetnoot459. dochter, ende desen overleden coninc Kaerls suster, die enen bult hadde, ende mismaect was, daer hij nyet willich toe en was. Ende gaf dit den paeus Alexander te kennen, allegerende ende seggende dat hij se uut vresen genomen ende getrout hadde, also lange als haer vader ende broeder leefden, begerende van haer te sceydene ende absolveert te wesen ende een ander te trouwen. Die paeus beval dese sake bi rescripte III bisscoppen in Francrijc te examineren, daer die biscop van Albien een of was, die een heilich man geheten was. Ende dese saten te rechte ende hoerden die partyen, ende ten lesten werden si beide mitten rechte gesceiden ende absolveert. Ende die coninc troude van stonden an dye wedue van coninc Kaerl overleden, hertoechinne van Bertangen, omdat hi dat hertoechdom van Bertangen an der cronen houden soude. Dwelke nochtans is tegen die edelheit van der cronen, want een coninghinne behoort wedue te bliven, ende die coninc van Francrijck en behoort gheen weduen te trouwen. Ende die coninc gaf sijnder eerster vrouwe Johanne, daer hi of gesceyden was, dat hertoechdom van Berry, horen staet op te houden, haer leven lanc. Ende dese vrouwe leyde een heilich leven in die stat van Borgers, daer si naemaels overleet.
In dit jaer van XCVII regneerde een alten wonderliken plage, doer alle die landen, die welken nye bi menschen memorie gehoert en was, oft datter yemant of te spreken wiste, ende was gecomen van Napels, die dye Franchoysen van daer neder in den landen brochten, doe si Napels wonnen, als voerseyt is. Ende dese siecte oft plage wert ghemeenlic genoemt Sint Jobs plaghe of siecte, oft die Napelsse ofte Spaense pocken, van welke pocken die luden mit allen siec waren, want si cregen se eerst an hoer scamelheden ende int aensicht, ende voert over alle hoer leden by groter menichten; ende dye sommige waren also mismaect alsof si lazarus ende malaetsch geweest hadden, dat men se nauwelic kennen en mochte, daer si alten groten pijn ende smarte an leden, ende lange tiden te bedde lagen. Die sommige crompen haer leden te samen, dat si niet roeren en mochten ende noch eten noch drincken, ende duerde mitten sommige sere lange. Mer daer quamen Spangers ende andere vreemde meesteren, die daer remedie toe wisten, ende cureerden ende holpen die luden, also datter luttel luden of storven. Mer die last ende pijn dye si leden was onsprekelic, want si daer VIII, X oft XII jaren an ghingen, eer si ghenesen mochten.
Auteursrechtelijk beschermd