Hoe dat hertoge Phillips in den lande van Vlaenderen quam ende dairna in Hollant ende in allen steden ghehult wert. Ende hoe die stede van Lederdamme twemael gewonnen wert.
Dat XI capitel.
In den jare M IIII C XCVII, in die maent van maerte, is die moghende vorst hertoghe Phillips, aertshertoge van Oestenrijc, hertoge van Bourgondyen, etcetera, mit groten state ende costlicheden gecomen binnen der stede van Ghent, daer hi rykelic mit groter solemniteiten ontfangen wert, ende veel wonderlicke ende costlike triumphen ende feesten gedaen ende ghehouden tot sijnder blider incoemst. Ende desgelijcs tot Brugge, tot Yperen ende in allen anderen steden ende plecken des graefscaps van Vlaenderen. Daerna, in den maent van junio, is hertoge Phillips mit groter staet van heren ende princen gecomen in Hollant, tot Dordrecht, daer hi seer eerliken ontfangen wert ende gehult na ouder costumen, ende vandaer tot Rotterdamme, tot Delft, in Den Hage, tot Haerlem, tot Amsterdamme, tot Leyden, ter Goude ende so weder na Dordrecht ende na Brabant toe. Ende in allen steden wert hi mit groter feesten ende bliscappen ontfangen; ende dair worden vele costlike batamenten ende stomme figuren getoent, dat te lang ware te scriven dye pomperien ende costlicheden van toortsen ende vieren ende andere triumphen die in allen steden gescieden ende gedaen werden.
Een weinich tijts tevoren, eer die prince in Hollant quam, was de here van Yselstein mit groot volc van knechten ghetogen int lant van Ghelre in Tyelrewaert, ende branden daer III of IIII dorpen. Dit siende die Ghelresse ende bysonder die van Nyemagen togen uut om dit te wreken; ende dander hadden vele lagen geleyt, ende quamen an malcanderen, ende sloegen deen den anderen met allen seer, so datter vele doden an beyden siden bleven; mer meest van die van Nimmagen. Ende daer werter oec vele gevangen. Daerna, in den herfst, cregen die Ghelressen in mit cloecheden die stede ende tslot van Lederdamme, ende deden daer veel quaets uut in den dorpen daer omtrent gelegen van roven ende branden ende van grote brantscattinghen ende verdingen te nemen. Die hertoge van Sassen dit vernemende, is mit grooter machte ghecomen tot Gorichom, ende heeft de steden van Hoekelom ende van Asperen mit starcken garnisoenen beset, ende dede een starc blochuys slaen omtrent Lederdamme, dat si nergens uut noch in en mochten, ende waren mit allen sere benaut, ende hebben hem mits dien opghegeven in des hertogen handen, behouden lijf ende goet; ende sijnder weder uutgegaen. Ende onlancs na desen sijn die Ghelresse getogen in die Meyerie van Den Bossche, rovende ende brandende III of IIII scone dorpen, ende deden grote scade ende namen daer enen groten roof ende vele gevangen mit hem. Ende overmits desen rebelheit van den Ghelressen, ende dat si hem gansselic ofkeerden van der obediencie des huys van Bourgondien, ende grote scaden dagelicx deden in des princen landen, so worden alle haer goeden ende possessien, renten ende pensien confisceert ende toegheslegen die si in allen desen landen op die tijt hadden. Ende dye hertoge van Sassen hadde op dese tijt een brugge doen maken van vlotte drivende op die rievere van der Masen, wel starck gheanckert, daer wel IX oft X reisigers beneven malcanderen over riden mochten int lant van Ghelre; ende deden dagelics grote scade mit roven ende branden. Daernae, in november, heeft die hertoge van Sassen dye stede van Batenburch beclommen ende ingenomen in die margenstont mit geweldiger hant. Die poorters namen terstont horen toevlucht op tslot dat seer starc was, ende hilden dat mit vromicheit een wijl tijts tegen die stede, ende scoten mit allen seer tegen malcanderen, datter an beyden siden vele doot bleven. Mer die knechten scoten so vreesliken ende stadeliken op tslot ende daerinne, dat si toornen ende muren ter neder velden ende scoten, ende waren in meninge om tselve slot te bestormen; mer die van binnen gaven hem op behouden haer lijf. Ende die hertoge dede dat slot repareren ende starc maken, ende sette daer een capiteyn op mit vele knechten, die dagelix vele scaden deden int lant van Ghelre. Ende daerna, in den maent van december, wert een bestant gemaect tusschen dese landen ende tlant van Ghelre,
Auteursrechtelijk beschermd