Van Frederic, marcgrave van Baden, die LVI biscop van Uutrecht.
Capitel X.
Fredericus, marcgrave van Baden, des marcgraven Aelbrechts van Baden ende des keyser Frederijcs van Romen dye Derde suster soen, als here David van Bourgondien, biscop van Uutrecht overleden was, wert eendrachtelicken van allen den capitelaren gecoren tot enen biscop van Uutrecht ende quam op Sinte Lambertsdach op eenen sonnendach te III uren na middage binnen der stadt van Uutrecht, mit veel groter heren ende edelenGa naar voetnoot455 mit enen state van V C paerden ende veel voetvolcs, ende wert mit grooter eren ende feesten ontfangen van al den geesteliken, prelaten ende heren van der ridderscappe ende edelen van den Stichte ende van den burgeren ende oversten des stats van Uutrecht ende anderen steden voer enen here ende biscop, ende wert geset mit groter bliscappen ende triumphen in des biscop zetel ende consacreert ende ghewijt dye LVI biscop van Uutrecht. Ende sant te Romen an den paeus Alexander den VI om die confirmacie ende an sinen oems soen den Roemschen coninc Maximiliaen om dat regael, dwelc hem mit eren ghesonnen wert. Mer also hi dat bisdom mit rust ende vrede beseten heeft, so heeft bi vrie resignacie sijn bisdom van Uutrecht over gegeven den eerwaerdigen here Phillipus van Bourgondien. Ende die wert met groter triumphen gentroniseert ende in sijn biscops stoel geset, anno XV C XVII.
Op dit pas was tgelt weder na der lester ordinancie geset ende alle hagemunten verboden, dwelc men op dese tijt starclic aftervolchde ende onderhouden wert; want dye gouden ende silveren penningen van der niewer munten in groten getale in den lande quamen. Ende alle hagemunten die men doe uutgaf most men geven na advenant van der settinge, als: een Davids Gulden XXV stuverGa naar voetnoot456, een Horenkens Gulden XIII stuver, een Uutrechse jager III groten, een Groninger stuver, een Woechei, VII deuten. Waerom dat se mit hopen int Sticht endeGa naar voetnoot457 Vrieslant gevoert worden, wanttet gelt dair hoger ginc.
Auteursrechtelijk beschermd