Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dye Leckdyke inbrac, ende hoe dat biscop David van Uutrecht oflivich worde.
Dat IX capitel.

Den XXIIII dach in januario, int jaer van XCVI, is weder een nyewe valuacye gesciet: een Andries Gulden wert gheset op XXVIII stuvers; een gouden gulden XXVII stuvers; ende ander gout na avenant. Die Phillippus ende Karolus stuver op II groten ende een halve; een Vieryser IIII groten ende een halve, ende ander silver ghelt daer na. Ende alle andere gouden ende silveren penningen van hagemunten waren verboden ende geacht voer billoen. Ende dit soude duren totten XVI dach in aprille, ende dan soude een gouden gulden weder doen XXIII stuvers, een vieryser II stuvers, ende ander ghelt nae avenant. Ende op dese settinge was die munte gheordineert om nyewe goude ende silveren penningen

[p. 418r]

te munten. Ende wat goude penningen na dyer tijt haer gewichte niet en hadden ende te licht waren, en souden genen ganc hebben, mer men soud se in die wissel brengen, want na die tijt soud men alle goude penningen na den gewichte moeten geven ende ontfangen; welke ordinancie niet lange onderhouden en worde, ende alle haechmunten ghingen ende tgelt rees weder alst plach te doen.

Opten Aschelen Woensdach int selve jaer wert die Leckedycke van den yse doergesteken, wanttet daer te voren sere hart gevroren hadde, als dat mitsdyen omtrent Uutrecht, Woerden ende die dorpen daer omtrent leggende veel ende groot water in den lande quam, ende groot scade dede, wanttet nyet dan een zee overal en was te sien, mer den dijc wert corts daerna weder ghemaect. Ende op Sinte Geertruden dach daerna begant starckelic te wayen uuten noortoosten, dat Velser dijck omtrent Haerlem inbrac, ende datter groot water omtrent int lant quam, ende vele grote scepen voer Amsterdamme bedorven, datter groot scade gesciede. Ende als dat water, dat uut de Lecke omtrent Uutrecht ende Woerden was, quam mit enen zuytoesten wint in Rijnlant, sodat alle dye venen ende die dorpen in Rijnlant onder water lagen. Mer ten duerde niet lange, dat water cesseerde ende minderde seer, nadattet veel ende groot in den landen was.

Int selve jaer, op Sint Jorijsdach, starf die eerwaerdighe vader in Gode, here David van Bourgondien, biscop tUtrecht, die dat bisdom in groter vreden ende eendrachticheit hadde regeert XL jaren lang, ende hi starf op tslot tot Wijc te Duersteen. Ende wert mit groter eren ende eerwaerdicheit begraven in derselver stede van Wijc in die prochykercke, midden in den choer voer dat Hoge Altaer.