Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoghe Phillips huwelicte an des conincs ende des coninghinne van Spangen ende van Aragon tweeste dochter ende die prince van Spangen, haer beyder enige soen, an vrouwe Margriete, des Roomssen Conincs dochter, hertoge Phillips suster.
Dat VIII capitel.

In dit jaer van XCV, in die maent van november, is vrouwe Margriete van Oestenrijck, van Bourgondien, uutgegeven ende gehuwelict an Ferdinant, des conincs ende der coninghinne van Spangen ende van Aragons eenige soen. Ende is van den ambassiaten van Spangen te Mechelen beslapen, daer groten staet, triumphen ende feesten bedreven worden van steken, tornyeren ende andere oeffeningen. Ende corts daerna, in januario, int jaer van XCVI, wert oec tracteert van denselven ambassaten uut Spangen tusscen hertoge Philips van Bourgondien ende vrouwe Johanne, des voornoemden coninc Ferdinants ende vrouwe Ysabele, coninghinne van Spangen ende Aragon II dochter, ende wert concludeert ende gesloten in sulker manieren dat men dye dochter harwerts over senden soude. Ende int selve jaer, in die maent van september, is die voornoemde vrouwe Johanne uut Spangen in Zeelant angecomen, meer dan mit C groter scepen ende met XII C mannen, mit een eerwaerdich bisscop, die tot Antwerpen overleet, ende mit meer andere grote machtighe heren ende edelen, mit groter staet, costlicheit ende chyerheit, omme taftervolgen tselve huwelic alst voersproken was; ende is dieselve vrouwe Johanne tot Antwerpen ghecomen. Waeromme dat, midts desen, snelle boden haestelicken uutghesonnen sijn om hertoge Phillips, dye doe ter tijt noch in Hoech-Duytslandt was by sinen vader, ende werdt aldaer in alle die Oestenrijcse⁴⁵² steden van sinen vader ghehult ende ontfangen geweest. Aldus heeft hertoge Philips oerlof genomen an sinen vader, ende is van stonden an in Brabant

452 Oestenrijcsse AB.

[p. 417v]

gecomen tot in die stede van Lyere, daer hi sinen bruyt ontboden heeft, diewelke hi daer mit genen oft luttel triumphen, state, ende costlicheit, simpelic getrout ende beslapen heeft in die maent van october. Ende hevet an haer gewonnen II sonen ende IIII dochteren. Die outste soen, genoemt Kaerl, wert geboren int jaer XV C tusschen Sinte Pieter ende Sinte Mathijs dach, ende was een scrickeljaer. Ende hem was tot enen wive versekert vrouwe Glande, coninc Lodewijcs dochter die XII van Vrancrijck, dwelc casseert ende te nyete gedaen wert; ende nam te man den grave van Valoys ende van Engolemme, de na coninc Lodewijcs doot coninc van Vrancrijc werdt. Daerna was hem te wive versekert vrouwe Marie, coninc Henricx dochter van Engelant die VII, dwelc oec casseert wert, ende si nam te manne coninc Lodewijc van Vrancrijc dye XII voornoemt. Die ander soen was genoemt Fernant, ende was in Spangen geboren int jaer XV C ende III. Dye outste dochter ghenoemt Alienora was geboren int jaer XIIII C XCVIII. Die ander dochter was genoemt Johanna, ende wert geboren int jaer XV C ende een, ende hadde te man den Coninc van Denemarcken. Die III dochter was geheten Maria, ende wert geboren int jaer XV C ende VI, ende hadde te man den Coninck⁴⁵³ van Hongarien. Die IIII dochter, ghenoemt Ysabele ofte Elisabeth, wert geboren na haer vaders doot in Spangen, int jaer XV C ende VII, ende wert genoemt na vrouwe Elizabeth, coninghinne van Spangen, vrouwe Johanne moeder. Ende vandaer is hi mit sijn suster, vrouwe Margriet, tot Bergen an Soem getogen, daer hem dye Spaenssche heren ende ambassaten verwachtende waren, ende heeft se den heren overgelevert omme te aftervolgen dat huwelic tusschen den prince van Spangen ende sijnre suster, diewelke dair van den heren ende edelen uut Spangen mit groter eren ende triumphen ontfangen wert. Daerna, int leste van januario, int jaer van XCVII, is vrouwe Margriete van Bourgondien, die lange in Zelant tot Middelburch gelegen hadde tot Aremuden tscepe⁴⁵⁴ gegaen, omdat si enen genoechlicken wint hadden in Spangen te varen. Ende sijn mit veel groter ende scone scepen tzeyl gegaen, wel toegemaect ende starckelic vermant mit vele edelen mannen ende vrouwen uut desen lande, die mit haer gereyst sijn, alst wel betamelic was tot sulcken reyse; ende als si doer dye hoofden gecomen waren, is hem die wint contrari gevallen ende mosten in Engelant gaen legghen in die haven tot Hampton, dair si omtrent III weken lagen om enen goeden wint te wachten; ende dit wert den coninc van Engelant verboetscapt. Ende heeft daer die edelste ende machtichste heren van sinen hove gesonnen, ende deden haer grote propinen ende scenckeryen, reverencie ende eerwaerdicheyt van des conincs wegen. Ende corts daerna cregen si enen bequamen wint ende sijn in Spangen gecomen, daer si mit groter bliscappen ende state ontfangen wert. Ende heeft den prince van Spangen aldaer getrout ende beslapen mit groter feesten ende triumphen, ende gewan an haer enen soen, die seer jong starf; ende corts daerna, binnen denselven jare, starf oec die prince van Spangen, daer uutermaten groten droefnissen ende uutwendigen rouwe omme bedreven wert. Ende vrouwe Margriete bleef noch een lange wile daerna in Spangen, ende quam int beghinsel van den jare van XV C weder over uut Spangen in Vlaenderen, bi horen broeder, die doe tot Ghent was.

453 Connick AB.

454 tsepe AB.