Hoe dat Ritzaert, die men ghemeenlic noempt die Witte Rose, coninc Eduwaerts soen die III van Enghelant, overreysde in Engelant om dye crone te conquesteren.
Dat V capitel.
In den jare M IIII C ende XCV, des maendages na der octaven van Paesschen, des avonts laet, is binnen der stede van Haerlem gecomen RitzaertGa naar voetnoot450, des conincs Eduwaerts soen van Engelant, die men gemeenlic noemt die Witte Roese; daer hij een wijl tijts lach logeert totten heren van Sint Jans oerde, om te verwachten sijn volc ende ander gereetscap ten oerloge dienende, daer hi mede over in Engelant reysen woude om sijn vaderlike erve ende crone te conquesteren, die hem van rechtsweghen toebehoerde; diewelcke Ritzaert een jong kint was van VI jaren ende heimelic in Yerlant gelegen hadde. Ende men wiste int hele conincrijc niet, dan dat hi doot gheweest ware, want Ritzaert, coninck Eduwaerts broeder, wert coninc van Engelant na sinen broeder Eduwaerts doot; ende dese was oem van desen jongen; ende wert in enen stride verslegen doe die grave Henric van Ritsmont die crone van Engelant mitterhandt wan, als ic hiervoer int lange hebbe, in den jare M IIII C LXXXIII. Ende als dese jonge Ritzaert lange tijt in Yerlant, daerna in Francrijc bi den coninc onthouden was, wert hi daer bekent ende hem werden van Mechelen heimelicke brieven van credencien gesonnen, als dat hi hemselven uut Francrijc gesteken heeft ende is tot Mechelen gecomen bi sijnre moyen, vrouwe Margriet, coninc Eduwerts suster, hertoge Kaerls van Bourgondiens wedue, die hem lange tijt onthouden heeft int hof van hertoge Phillips van Bourgondyen, ende hem grote assistencie, hulp ende bystant ghedaen hebben omme die crone van Engelant weder te conquesteren ende te vercrigen. Hierna VIII dagen in junio is dese Ritzaert, dye Witte Rose, des margens mit al sijn gheselscap van Haerlem getogen na tdorp van Egmont int cloester, ende so voert na teylant van Texsel; mer tmeeste volc was al butenomme passeert langes die zeestrange ende lagen daer een wijl tijts om haer scepen te bereiden ende andere dingen te verwachten die hem node waren tot deser reyse. Ende opten eersten dach van julio sijn si mit enen geluckigen winde ghezeylt na Yerlant, want hi in Engelant niet comen en dorste, daer hi hem lange tijt onthielt, ende is van daer int conincrijc van Scotlant getogen, daer hi te wive nam des graven dochter van Duglas; ende overmits hulpe van dien vergadert heeft een groot machtich volc van wapenen, dair hi mede over in Enghelant toech om mit machte die crone te conquesteren. Mer de coninc Henric, doer grote subtijlheit, heeft hem geleye gegeven, dat hi binnen Lonnen gecomen is; ende werdt daer een wijl tijts in eerlicken state onhouden; mer doer enige onere ende smadelicheit die hem bewesen wert, is hi al heimeliken uut des conincs hof gesteken; mer hi wert naerstelic aftervolget, als dat hi hem gecregen heeft, ende worden vele scanden ende scoffiericheden angedaen, ende wert gevangen ende in sekeren hoeden gesettet. Ende dit geschiede hierna int jaer van XCVIII. Ende als hi hem een wile gevangen hadde gehadt, heeft hi hem openbaerlic ter justicien doen setten binnen der stadt van Lonnen, daer hi int openbaer gerecht wert mitten swaerde, ende was int jaer XCIX.
Auteursrechtelijk beschermd