Hoe datter een grote twist opgestaen is in Oest-Vrieslant tusscen die stede van Groeningen ende die ander steden.
Dat LXXXIIII capitel.
OmtrentGa naar voetnoot435 dese tijt stont een grote twedracht ende twist op in Oest-Vrieslant tusschen die stede van Groeningen an deen syde ende dye stede van Sneeck mit andere steden an dander syde. Want die van Groeningen wouden alle dandere steden dwingen te staen tot horen geboden, ende dat si tot genen anderen plecken noch steden mit hoer goet, suvel ende anders ter marct trecken en souden, dan binnen der stede van Groeningen; daer die stede van Sneec ende sommige andere niet in consenteren en wouden, ende wouden mit haer goeden trecken ende vercopen daert hem beliefde. Also dat uut desen een getal van M knechten van die Grote Gaerde gecomen sijn in Hollant, die tot Sparendamme tscepe gegaen sijn om na Vrieslant te trecken. Ende dit was in augusto, int jaer van XCIII. Mer hoewel die sprake ghinc van Vrieslant, so scenet na alle manieren dat si een ander opset hadden. Mer waer, hoe oft wat, was den gemenen man ontcondich; of twaer dat si landen souden en kont men in der waerheyt niet vernemen. Ende IIII dagen hierna, so sijn si tot Sparendamme weder angecomen, want hem die wint contrarie was, als dat hoer opset te nyet ghinc; ende togen weder vandaen si gecomen waren. Mer nadat si wech waren, ghinc die gemeen sprake ende fame dat si die stede van Campen ingenomen souden hebben, indien hem die avonture mede geweest ware. Een wijl tijts na desen is een grote menichte van desen knechten ende andere vergaert volc int lant van Ghelre gecomen, ende bedreven daer veel quaets van roven, van branden, van vangen, ende scatteden den armen lantman mit allen seer, so dattet lant gheheel ende al bedorven wert. Ende die Ghelresse knechten deden desgelijken an dander syde, ende namen grote brantscattingen ende verdingen. Ende ditselve oerloge van tlant van Ghelre wert alle dage arger ende quader, ende duerde seer langhe; want sommige fortressen ende sloten inne genomen werden vanwegen hertoge Philips van Bourgondien, daer si veel quaets uut deden int lant van Ghelre.
In dit jaer van XCIII wert een ander evaluacie van den ghelde geset, wanttet seer bestont te risen, als een Gouden Ghulden op XXVII stuvers; een Andries Gulden XXVIII stuvers; een Vieryser IIII groten ende een halve; een Phillippus ende Carolus stuver II groten ende een halve, ende voert alle paymenten van goude ende silver daernae; ende voirt en soud men geen gouden penningen ontfangen noch uutgeven dan bi gewichte; ende des en souden gene hagemunten meer haren ghanc hebben, mer worden gehouden als billoen.
Auteursrechtelijk beschermd