Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die coninc van Francrijck troude die hertoechinne van Bertangen ende hoe vrouwe Margriete weder overgesonnen wert tot horen vader ende broeder.
Dat LXXXIII capitel.

Hiervoer heb ic gescreven hoe dat de oude graef van Albret defenderende ende bewarende was als generael ende overcapitein ende stathouder des hertoechdoms van Bertangen die grote, starcke stede van Nantes, hopende die hertoechinne te crigen tot sinen geechten wive; mer als hi sach ende mercte dat si den Roemschen Coninc ondertrout had, was hi des niet wel te vreden. Ende also die Franchouysen die stat van Nantes weder belegen hadden ende die dagelics assaulleerden ende bestormden, heft hi se te lesten den Fransoysen opgegeven. Dit verhorende die hertoechinne, haer houdende te Rennes ende cleine hulpe ende bistant hebbende, ende bina omsingelt wesende, so most si van nootswegen tractate maken mitten coninc van Francrijc; ende dat gesciede in dese manieren: als dat die coninc tlant van Bertangen behouden soude bi middele van V C M ponden Tournoysen tsjaers ende van te betalen dye zoudie van den knechten die onbetaelt waren; ende hi gaf hair geleide te reisen totten Roemschen Coninc Maximiliaen, haren brudegom. Mer aleer dat gesciede, waren der ander makelaers tusscen beiden gaende, so datter een hilic tusscen den coninc van Francrijc ende der hertoechinne gemaect wert, dwelc also gesciede. Ende in der stat van⁴³⁴ Tours troude hi die hertochinne, ende daer wert die feeste van der bruloft gehouden. Ende corts daerna liet die coninc vrou Margriet van Oestenrijc, sijn eerst bruyt, out sijnde XI jaren, wederkeren tot horen here vader ende broeder in Brabant, costlic begaeft van ghelt, cleinoden ende juwelen, hem excuserende bi sine ambassaten, dat niet geoerloft en was noch betaemde joncfrou Margriet te nemen tot enen gechten wive tegen haer vaders wil ende consent, die altijt tegen hem oerloch sochte. Mits welken hilic van der hertoechinne van Bertangen grote murmuracie was in desen lande ende in Francrijc van al den volc; mer twart bevonden dat die procuracie van den voornoemde here van Polem gebrec had ende niet sufficiant en was; oec wast waer dat coninc Maximiliaen van sijn moeder wegen, de een dochter van Portegal was, ten

434 van van AB.

[p. 411v]

derden lede ende grade bestont dese vrouwe Anne, hertoechinne van Bertangen, van hare moeder wegen, die een dochter van Foys was. Want en hadde daer geen letsel geweest, so en hadde die Roomsche Coninc voornoemt geen ander wijf mogen trouwen; want hi hierna, int jaer van XCIIII, te wive nam Blancke Maria, ende was hertoghe Galeas dochter van Meylanen. Ende dese bruloft wert ghehouden tot Ysenbroec in Oestenrijc. Ende hertoge Lodewijc die Moere van Meylanen, haer oem, gaf haer te hijlicke CCCC M ducaten ende noch an cleinoden ende juwelen tot haren live wel LX M ducaten.

Op dese tijt, den XX dach in julio, was een grote lastigen brant binnen Haerlem; ende het waeyde seer op dese tijt, so datter groten weer ende cracht gedaen wert, datter niet meer scade en geschieden; nochtans branden wel VIII of IX goeder huysen, ende was des smargens in der dageraet. Op dese tijt dede een gouden gulden XXVII stuvers, ende een vieryser IIII groten ende een halve; ende alle andere gouden ende silveren penningen dairna.