Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Grote Gaerde int lant van Ghelre quam ende daerna omtrent die stat van Uutrecht.
Dat LXXXII capitel.

[p. 411r]

Hierna, int jaer van XCIII, int leste van januario ist geboert dat die capitein Witenhorst mit een grote menichte van knechten gecomen is voir die stede van Amersfoert om die heimelicken te becrachtigen ende in te nemen; mer tfaelgeerde⁴³³ hem, want die van binnen wordens gewaer ende sijn weder after rugge getogen, ende lieten een deel van dye ladderen in die vesten ende graven leggen. Daerna, int eerste van februario, is de Grote Gaerde van den hertoge van Sassen int lant van Ghelre getogen ende deden uutermaten grote scade int cloester van Marienwaert, want si dat cloester beroofden ende benamen hem vele dingen, ende branden op die tijt int lant van Ghelre vele scone dorpen. Ende int leste van derselve maent sijn dese knechten gecomen voer dye stat van Uutrecht, ende besetten die poorten van der stat, datter niemant in noch uut en mochte, ende deden vele groter scaden voer die stat van roven ende branden, ende den scamelen luden hoer beesten te nemen. Opten VIII dach daerna werter een bestant gemaect, als dat men sprake hilt, ende dye princepale van dit geselscap ende die se daer hadde doen comen was die here van Yselstein, ende was daeromme der stat viant, omdat se hem Sinte Catrinen Poorte ofhandich gemaect hadden, ende oec mede om der justicie die si van sijn volc opten Paeschavont in den jare van XCI gedaen hadden, als voorscreven staet. Die stat van Uutrecht mit haren nabueren verduchtende hieruut meer quaets te comen, want dese knechten hem niet en ontsagen geen quaet of archeit te bedriven an geestlic of an waerlic, ende deden veel scaden van roven, van branden, van den luden te vangen ende anders alle tquaet deden dat si mochten ende conden, so werter so herteliken in gesproken ende tracteert, dat den here van Yselstein een somme van penningen toegeseit worden voir sijn resten ende achterwesen, ende die quartieren van den lichamen die buten an de poorten, toornen ende muren hingen ende die hoofden die opter poorten stonden, die worden altesamen ofgenomen ende opten kerchof begraven. Ende hiermede waren de partien verenicht ende al die knechten togen terstont van die stat van Uutrecht

433 tfaelgeeede AB.