Hoe dat die V hoeftsteden opstonden te belasten die stede van Haerlem ter cause van den contribucye van den oerloge.
Dat LXXXI capitel.
Hiervoer, int jaer van LXXXVIII, heb ic gescreven hoe dat die Roomsche Coninc hier neder in desen lande van Hollant ghecomen was, treckende van dene stede toten anderen, ende quam op die tijt oec binnen der stede van Haerlem, daer oec de steden van Hollant quamen, die die stede van Haerlem grotelic beclaechden ende swaerlic besculdichden, omdat si totten oerloge stille saten ende meenden die stede in groten laste te brengen. Mer die van Haerlem spraken also mitten coninc, dat hij se in gracie nam mit een somme van penningen, dair si een acte of namen mit des conincs hant onderteikent. Dwelke die steden van Hollant sere qualiken namen, overmits dat si hem om des oerloechs willen in swaren lasten ende oncosten vonden, sodat si dagelicx grote naersticheit deden ende meenden, hoewel dat si een acte van den coninc hadden, dat si daeromme niet stille en souden sitten, mer wouden dat si mede contribueren ende geven souden gelijken andere steden, ende gaven dit den hertoge van Sassen mit groter beclachten te kennen; dwelc dus bleef hangende ter tijt ende ter wilen toe dat die Vriesen aldus binnen Haerlem quamen, als voir gescreven staet. Mer die steden hadden dieselve sake int Hoge Hof gebrocht, als dattet lange in een pleyt stont, ende deden die stede van Haerlem vele grote molestacien. Hierna, doe dye poorten van Haerlem opgeslegen waren ende de hertoge van Sassen binnen der stede gecomen was als voorscreven staet, so sijn alle die V steden van Hollant als Leyden, Delft, Dordrecht, Amstelredam ende Goude terstont tot Haerlem bi den hertoge gecomen tot afterwesen van der voorscreven stede, als menende mitsdyen die stede te overvallen, mer en conden tot hare meningen also niet comen als datter op dat passe niet of en quam. Aldus is dese sake noch een wijl tijts bliven hangende; mer die steden en hebben niet ofgelaten, als dattet so verde gecomen is, dat enige notabele eerbare mannen dese saken in handen genomen hebben, ende hebben een alinghe submissie gemaect op grote peynen tusscen den V steden voornoemt aen deen syde ende der stede van Haerlem an dander side. Ende hebben een seggen pronunceert ende daer van gedaen als dat die stede van Haerlem hemluden een somme van XX M gulden geven souden te betalen binnen den termijn van III jaren; mer so het sceen, so en beloefdens hem die V steden niet seer na die grote somme van LXXV M gulden die si der stede van Haerlem eysscende waren. Ende dit scrijf ic dairom, overmits dat die ene stede dicwils om des anderen qualic varen verblijt; nochtans, die den anderen jaecht, en rust selver niet. Want het blijcte, hoewel die stede van Haerlem grotelic belast was ende vele scattingen ende ongelden geven moste, dander steden en worden nyet vergeten. Want eylacen! die scattinge ende exactie die die hertoghe van Sassen op dese tijt int lant van Hollant eysschende ende oec nam, en was nye desgelijcx gesien noch gehoort. Ende tlant van Noort-Hollant ende Kenemerlant, die een wijl tijts sonder scattinge geseten hadden, die gaven ende mosten geven alle dat men hem geven hiete, overmits dat si die princepale van den oplope ende rebellicheit waren. Aldus ist van node dat men bi wilen sulke accidenten ende gescienissen in memorie settet ende bescrivet, opdat bi avonturen hem enige steden of landen daeran spiegelen ende exempel nemen mogen hem voer sulken twedracht te wachten ende goede nabueren te bliven. Want als dene stede van den ander gaet, dat plach al te qualic te varen, alst eylacen op dit passe dede. Want ic scrive dat in der waerheit, dat nye grave van Hollant geweest is die also veel scats ende goets uuten lande scattede ende haelde, als die hertoge van Sassen doen properlic alleen op dese tijt uuten lande scattede ende creech.
Auteursrechtelijk beschermd