Hoe dat die hertoge van Sassen binnen der stede van Zijricxzee quam mit subtijlheden ende ter obediencien brocht.
Capitel LXXIX.
Hierna, opten VIII dach van junio, is die hertoge van Sassen uut Haerlem getogen, ende desselven nachts so sijn alle die bussen, groet ende clein, die der stede toebehoerden, wechgevoert; want terstont als die hertoge binnen Haerlem quam worden alle die bussen dye om die stede in die poorten, toornen ende an die muren lagen van hoer plaetse genomen ende voer die stathuys gebrocht, dye daerna int blochuys gevoirt worden ende van dair uuter stede. Oec mosten die poorteren alle hoer harnas ende weer geheel ende al opter stathuys brengen, eer die hertoge in der stede quam; ende doe die hertoge weder uuter stat getogen was, doen haelde elc sijn wapen weder. Ende die hertoge is mit al sijn volc uut Haerlem ende uut Noort-Hollant ende Kenemerlant getogen na Zeelant ende heeft mit subtijlheden ende properheit die stede van Zijricxzee inne gecregen, dair hi mit alle sijn volc binnen getogen is, overmits want si binnen deser tijt dat dit oerloge tusschen die van der Sluys ende ons heren landen staende was, qualiken hem gehadt hadden. Ende hebben dagelicxs ter Sluys inne- ende uutgevaren, tot horen believen daerbinnen brengende ende halende dat hem beliefde, ende meer ander dingen bedreven dan hem wel van rechts wegen betaemde te doen, also dat si die van der Sluys seer behulpelic waren, dwelc tot groten hinder ende achterdele was van den gemenen landen. Ende daer terstont een starc blochuys doen slaen, omme die stede mede te bedwingen; oec hebben si hem moeten geven tot emende om horen pays te hebben XXX M gulden, ende sommige poorteren tot sinen wille. Omtrent dese tijt quam de hertoge van Sassen mit al sijn macht voer die stede van Ghent, want, so men seide, meende hi daer mit subtijlheit in te comen. Mer dat opset ghinc te nyete, want die van Ghent werden dit gewaer, ende hebben terstont hoer slusen opgeset, ende lieten dat lant bevloyen, dat si rumen mosten, want si alle gevreest waren omme te drencken; nochtans bleeffer veel. Ende die van Ghendt deden op dese tijt justicie van dengenen die van dit opset wisten, ende princepalic over Coppenhol, die meest desen tijt hoer opperste hoeft ende capitein geweest hadde mit meer ander. Ende aldus sijn si vandaen voer der Sluys ghetogen, ende beleydent te water ende te lande. Ende terstont began dat coern merckelic of te slaen, wantter veel coerns van zuden quam, ende oec taldermeest omdattet so sconen weder ende tijt was, want so men seyde dat van een jaers daghe voert vervolgende van maent tot maent nye alsulken droechte ende schonen tijt beleeft was. Want aprille, meye, junius, julius, diewelke die princepael maenden sijn van tgehele jaer, elc scoenre, heter ende drogher was dan dander, als dattet binnen desen tijt nauwe V of VI mael regende. Ende oude luden seyden dat si nye droeger noch scoender zomer beleeft en hadden; ende hoewel dattet luttel regende, het doude alle nacht so starckelic ende so diep, recht oft groten regen nedergevallen ware. Corts hierna, int leste van der maent van julio, sijn die van Ghent in handen van den hertoge van Sassen gegaen ende deden hem een voetval binnen Hulst ende mosten hem een grote somme van penningen geven voer horen rebellicheden. Als nu dye hertoge die stede ende sloten van der Sluys dus starckelicken belegen hadden, so gescieden daer vele scermutsingen te water ende te lande; ende die van der Sluys quamen dicwils uut, doende grote scade int heer. Ende die hertoge hadde seer grote bussen gestelt ende scoot mit allen seer op dat cleine huys ende oeck in die stede, datter veel volcx an beiden siden doot bleef. Oec hadden die op tgrote casteel lagen veel goeder bussen ende desgelijcs binnen der stede, ende scoten mit allen crachtelicken op malcanderen, ende scoten veel volcs van binnen ende van buten doot, sonder yet anders te bedriven dat scrivens waert is angaende feiten van wapenen ende van oerlogen. Ten lesten heeft men seer naerstelic tracteert an beyden siden, als datter een goeden vasten pays gemaect is tusschen den hertoge van Sassen
Auteursrechtelijk beschermd