Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die stathouder van Hollant, heer Jan van Egmont, een slach hadde tegen die van der Sluys, ende hoe joncheer Frans van Bredenrode ghevanghen wert ende meer andere.
Dat LXXI capitel.

Hyervoir heb ick gescreven van joncheer³⁹³ Frans van Bredenrode, diewelke in Rotterdam gelegen hadde; ende is corts na den tractate dat hi mitten stalmeester des Roomschen Conincs gemaect hadde uut Rotterdam getogen ende is ter Sluys in Vlaenderen gecomen bi here Philips van Cleve, joncheer van Ravensteyn, dair groot volc angewassen ende bigecomen is van ballingen uut Hollant ende ander meer geselscaps. Ende heer Jan van Naeldwijc, die hem tegen den stalmeester gecoft hadde, is oec

393 jonchrer AB.

[p. 404v]

binnen Der Sluys gecomen mit meer andere, die dagelicxs veel scade te water deden, scepen namen ende veel volcs vinghen, ende stichten in zommige plecken brant, ende deden veel grote violencien ende lelicke feyten in de Goodshusen ende geestlicke plaetsen. Terwilen dan dat men voir die stat van Montfoirde lach, so sijn heer Jan van Naeldwijc, ridder, joncheer Frans van Bredenrode, mit meer andere capiteinen ende veel volcs van wapenen tot XVIII hoen toe ter Sluys tscepe gegaen, ende quamen geseylen in Zeelant, stichtende rooft ende brant ende deden veel quaets. Ende sijn ten lesten gecomen voir de stat van Dordrecht, ende branden een deel husen in Swindrecht ende een wintmolen bi Dordrecht, ende deden veel scaden, ende toghen weder after rugghe na Zeelant, in meninghe die stat van Ghoiree in te nemen. Die stathouder die dit verboetscapt wert, legghende mitten Hollanders voir Montfoert, is terstont mit meer ander edelen uut dat heere al heymelic gereyst ende is tot Dordrecht gecomen, ende deden zommige edelen in Zeelant ende voirt te Bergen an Zoom te weten dat sy hem gereet in wapenen houden souden ( hi woude dit volc van Der Sluys comen bevechten. Ende heeft van stonden an veel scepen doen bereyden, ende wel vermannen ende van als stofferen ende doen versien ten orloge dienende. Ende sijn na dit volc toegeseylt ende hebben malcander ghevonden, ende sijn terstont malcanderen an boort gevallen; ende dair wert mit allen seer gevochten ende gestreden, sodat ten lesten joncheer Frans wykende wert mit meer ander, ende hebben hair scepen an tlant geseylt, ende zijn te lande gheswommen. Die stathouder dit siende is hem ghevolcht, ende die ander stelden hem ter weer; ende dair gheviel weder een groten slach, in denwelken joncheer Frans seer ghequest wert ende gevangen, ende weder tscepe gebrocht ende binnen Dordrecht gevoirt, ende starf corts dairna van der quetsinge, ende wert totten Augustinen begraven in der kercken. Heer Jan van Naeldwijc siende dat hem die avonture³⁹⁴ contrarie was ende dat si die nederlage hebben souden, stelde hem mit meer ander op tlopen, ende liepen na die stat van Zijricxzee toe. In desen stride bleven so geslagen ende verdroncken boven CCC mannen. Ende aldus sijn si mit groter triumphen ende victorie weder binnen Dordrecht gecomen, brengende mit hem wel hondert mannen gevanghen, onder dyewelke dat mede waren Henrick Willem zoen ende Willem Willem zoen, gebroders, ghebannen poorters uut Leyden, ende die stat mit heer Reyer van Broechusen mede beclommen hadden; ende Willem wert binnen Leyden ghebrocht, dair hi ghevanghen wert gheleyt. Onder desen ghevanghen waren mede twe bastert zonen van den domproest van Uutrecht, heer Ghijsbrecht van Bredenroede, ende een bastert van Hodenpijl; ende dair werter veel van desen gheselscape mitten swaerde gerecht. Dese slach gesciede op enen vridach, des daghes na Sinte Marien Magdalenen dach. Ende heer Jan van Naeldwijc is weder binnen Der Sluys ghecomen. Henric Willemszoen voorscreven was gevanghen van den knechten, ende hadde hemselven ghecoft om III C gulden, behoudelic dat si hem heimelic houden souden ende hem leveren binnen der stadt van Breda; ende dair souden si hair penninghen ontfangen. Mer doir zommighe manieren dat hy ghebruycte is hi verkent geworden ende ghevanghen ghelevert in handen van den burghermeesteren der stat van Leyden, die de knechten voldeden van den rantzoene dair hi hem omme ghecoft hadde, ende wert mede binnen Leyden ghevangen gheleyt. Ende hebben beyde veel dinghen gheleden, ende zommighe bedraghen ende excuseert, ende sijn ten lesten beyde gherecht gheworden mitten swaerde. Ende die lichamen worden op een raet geset ende hoofden opter poorten.

394 avontre AB.