Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die hertoge van Zassen die stadt van Montfoirt beleyde, ende hoe dattet³⁹² gedadinct wert.
Dat LXX capitel.

392 aldus B; datteet A.

[p. 404r]

Dese tijt vol tribulacien ende verdriets noch vast hanghende, die heer van Montfoert, dye niet en ruste, heeft veel quaets te water ende te lande ghedaen, ende den coopman ende anders veel luden bescadicht, gevanghen ende grotelic ghescattet; soedat ten lesten die Hollantse steden ontboden hebben den hertoge van Zassen, die in Hollant ghecomen is, ende hebben grote gereetscap gemaect van allen dingen ten orloge dienende, ende sijn te velde ghetoghen tusschen Woirden ende Montfoerde. Ende int leste van den meye, int jaer van XC, sijn die hertoghe van Zassen, die stathouder van Hollant, mit meer ander heren, ridderen ende knechten ende mit groter macht van volck ghelijck ghetogen voir die stat voir Montfoirde, ende hebben die crachtelic belegen ende haer legers dair gemaect, ende hebben hair bussen, engienen ende andere instrumenten terstont opgherecht ende te werck gestelt, ende hebben mit allen crachtelic op die stede gescoten, sodat si poorten, toornen, muren ter neder scoten ende gheheel weerloes maecten. Ende int eerste van julio bestormden die Henewiers de stede, ende hem en wert gheen grote bystant van den Duytschen gedaen, sodat si vromelic weder ofgheslaghen worden ende niet en bedreven. Dairna, int leste van julio, hebben si weder grote gereetscap gemaect ende bestormden anderwerf die stat; mer die brugge die si over de graften gemaect hadden begaf hem ende ging op de gront sitten, sodat mitsdien hair opset te nyete ghing, ende worden weder ofgeslaghen, ende hadden veel doden ende ghequest volck. Ende in dit bestormen wert die leste broeder van den grave van tZhoerle dootghescoten ende tot Antwerpen gebrocht by sijn ander broeders, want si allegader in den velde gebleven waren. Ende die van Montfoerde quamen al by wilen uut int heer, ende slogen ende vinghen hem veel volcs of, ende hadden vele scermutsingen tegen een. Dit belegghe dus gedurende, hebben si malcanderen veel volcxs of dootgescoten ende gevangen, ende die van buten sochten veel listen ende subtijlheden om die stede te crencken ende in te nemen. Ten lesten sijn die grave van Nassouwen ende die grave van Chimay in Hollant gecomen, ende hebben so herteliken ende mit goeder manieren also mitten hertoghe ghesproken omme dese twist, scade, hinder ende grote verderflycke oncosten ende dye grote bloetstortinghe te beletten, als dat si enen vasten pays gheraemt ende ghesloten hebben tusschen den hertoghe van Zassen mittet lant van Hollant an dene sijde tusschen den heer van Montfoert an dander sijde; ende dit ghesciede in dye maent van Oest. Ende die heer van Montfoirde heeft dat slot van Woirden opghegheven in handen van den hertoghe van Zassen, ende is dat slot gheruymt mit alle sijn huysgesinne, mit hem nemende dat hi opten huse hadde ghebrocht. Ende de partien an beyden sijden sijn verenicht; mer hoe ofte in wat manieren is den ghemenen man oncondich gheweest ende is allene onder tsecreet van den heren ghebleven. Ende die heer van Montfoerde heeft den hertoghe van Zassen als stathouder generael in den naem des Roomschen Conincs ende sinen zoen gheloeft ende gesworen hout ende trou te wesen ende uut sinen stede gheenen orloghe voeren noch doen voeren opten lande van Hollant als in der zoenen breder begrepen staet. Ende die hertoghe heeft enen anderen casteleyn op thuys te Woirden geset, ende alle dye knechten die binnen Woirden ende Montfoirt gelegen hadden wert geley gegeven ende gingen terstont elc dairt hem belijefde; ende mit deser zoenen worden alle stromen ende passagen weder opgedaen, sodat men overal weder veylich ende vry reysen mochte