Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die van Woirden tblochuys by Woirden van den Hollanders opgeslagen wonnen ende dorp van Boegraven verbranden, ende hoe de hertoge van Zassen eerst int lant van Hollant quam.
Dat LXVIII capitel.

[p. 403r]

Onlanxs hierna heeft die stathouder van Hollant, heer Jan van Egmont, alle die knechten leggende in garnisoene tot allen plecken byeen vergaert, ende is mit al den hoop getogen voir die stat ende tslot van Woirden, ende heeft al vast by die stat an die Rijnsijde een groot, swaer blochuys opgesleghen, ende heeft dat wel beset ende voirsien mit cloucke knechten ende anders wes hem van node was; diewelcke³⁸¹ tot diversen tijden vele scermutsingen ende mangelingen tegen die van Woirden gehadt hebben, ende sloegen malcanderen veel volcxs of. Ende overmits dattet in desen tijden een seer natten herfst was, sijn vele van desen knechten gaen leggen binnen den dorpe van Bodegraven, dat si omgraven lieten, in meninghe hem dair een wijle te onthouden, ende te beletten dat die van Woirden op die sijde gheen scade meer doen³⁸² en souden. Mer cortelick hierna, int eerste van octobri, sijn een groot deel knechten uut Woirden gegaen, ende quamen binnen Bodegrave by sconen dahge, dair nochtans veel knechten in lagen, die hem luttel ter weer sette, mer namen de vlucht ende liepen wech, ende verbranden een groot stuck van den dorpe, ende quamen weder ongescent binnen Woirden. Opten VIII dach dairna sijn dieselfde knechten doir heymelicke wegen doir dye venen gegaen, ende quamen voir die stadt van Naerden, ende quamen al heymelicken mit ladderen an die muren om die stede te beclimmen. Die ingeseten ende poorters worden dit gewair ende quamen snelliken gelopen na die muren ende opten poorten ende toernen, ende scoten mit allen vreeslick op dese knechten, ende keerden se vromelic van die muren, afterlatende vele doden ende gevangen, ende ruymden weder afterwerts mit groter scanden ende scaden. Ende desgelijcxs quamen si in die maent van october voir die stede van Oudewater, dair si oeck mit crachte van dye muren ghekeert worden, ende niet bedreven en hebben. Corts hierna, in die maent van november, is dye hertoge van Zassen in desen lande van Hollant gecomen tot Leyden, ende toech van daen binnen der Goude om te tracteren tusschen dat lant van Hollant ende den here van Montfoerde; mer dair en wert niet bedreven oft tracteert om tot een payse te comen; ende quam weder binnen Leyden, dair een dachvert van allen den steden van Hollant ghehouden wert. Mer de hertoghe is haestelicken weder na Brabant ghereyst om nootsaken den ghemenen landen angaende. Ende omtrent desen tijt branden die van Woirden dat dorp tot Stolc, ende togen doir die venen tot in dorp van Nyerberch ende pilgeerden dat mede; dye nochtans in verdinge saten ende brantscattinge ghegheven hadden tot deser tijt toe

381 aldus A; dieweke B.

382 aldus A; deen B.