Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dye heer van Montfoorde een anslach gemaect hadde om dye stede van Leyden in te nemen.
Dat LXVI capitel.

Die heer van Montfoorde binnen Woorden³⁶⁴ ende op tslot van Woorden hem onthoudende, is heer Jan van Naeldwijc, ridder, bi hem gecomen, hebben enen anslach ordineert ende gemaect om de stede van Leyden in te nemen; ende hebben hem starc gemaect van uutgelesen ende vrome knechten, tot M toe, ende sijn gecomen opten XIII dach in junio, tusschen den saterdach ende sonnendach des middernachtes, voir³⁶⁵ die stede van Leyden, ende zwommen die graften ende vesten over, ende quamen met ladderen an die muren, menende dye stede in te nemen ende te beclimmen, ende riepen: 'Brederoede, Montfoirt, Bruechusen!'; ende dit was niet verde van die Zijlpoorte dair si dit bestonden. Die poorteren van Leyden dit vernemende, liepen terstont op de vesten ende an die muren, poorten ende toornen, ende keerden die vianden vroemlic van die muren, ende stonden malcanderen trowelycken³⁶⁶ by, nyet ansiende enighe partye, gonst oft vrienden, ende sloeghen se weder van muren; ende als si met bossen ende cloeveniers begonnen te scyeten, keerden si aerseling weder, latende dair sommighe doden. Ende int wederkeren quamen si voir dat huys te Poelgheest, binnen der dorpe van Coudekercke, ende heere Gherrit van Poelgheest, ridder, gaft hem mit willen op, dair hy nochtans alle dage zoudye ontfing van dye stede van Leyden tot bewaernisse van tselve huys ende wel betaelt was, ende hem bossen, buscruyt, artelrye ende ander instrumenten ende gereetscap, dat men op een huys behovende is ende ten orloge dienende, ghelevert ende gegeven hadden. Ende van dit opset van voir Leyden te comen waren sommyge poorteren binnen der stede dat wel wetende, ende gavent op die tijt den stadthouder van Hollant, heer Jan van Egmondt, die binnen Leyden was, te kennen, ende toenden dye brieven, dye hem ghescreven waren, ende waerscuweden se, dat si wel toesaghen dat hem die stede nyet ofghelopen en worde; mer si en achten nyet op ende hyldent voer spot. Dair nochtans om dyeselve sake wille (een dye

364 aldus A; worden B.

365 aldus A; voier B.

366 aldus A; torwelijcken B.

[p. 402v]

die brieven ontfangen hadde ende ghetoent) mitten swaerde gherecht worde in Den Haghe, ghenoemt Willem Jacob Everts zoen dye Brouwer, van Warmont gheboren, een eerlick out man van LXX jaren; God vergeeft dengenen diet dairtoe brochten. Die knechten op tslot te Poelgheest legghende ende dat begrepen hebbende, hebben dat slot bebolwerct ende seer starc ghemaect, ende deden al tquaet dat si mochten omtrent dye stede van Leyden, rovende, pilgerende ende den lantluden ende andere uut Leiden bescadende dair si konden ende mochten. Soe heeft ten lesten die stathouder mit die stadt van Leyden vele knechten vergadert mit³⁶⁷ sommige poorteren uuter stat, ende hebben dat slot te Poelgheest crachtelic omme beleghen, ende stelden dairvoir grote hoeftstucken, cortouwen, engienen ende ander instrumenten, ende scoten mit allen seer op dat slot ende toornen, ende bysonder op enen groten ronden toorne, dat dair niemant op duren en mochte. Ende ten lesten gaven si dat huys op, ende die van Leyden dedent of breken ter aerden toe, ende wert destrueert ende verwoest.

367 aldus A; met B.