Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe heer Jan van Egmondt, stadthouder van Hollant, dye stede van Hoern innam, ende hoe dye van Rotterdamme een scermutsinghe hadden teghen die van Dordrecht, Goude ende Scoenhoven.
Dat LXV capitel.

Die van Hoern, als die overste ende regenten verduchtende dat dye zommige van der stede enighe vreemde gasten inlaten mochten, om dat Noerderlant in roere ende rebellich te maken, hebben al heymelick ontboden heer Jan van Egmondt, stadthouder van Hollant, hierin te willen voirsien. Ende is opten heilighen Goeden Vridach, als men de Passie prekende was, sonder enich gherucht in der stede ghecomen. Die zommighe van den poorteren dit vernemende, liepen uuter stede, om quaet verduchtende, ende worden weder in geboden op hair goeden ende possessien te comen, sodat hem gheen arch noch quaet ghesciet en is. Ende hy besette dye stede mit zommige ruters ende ingheboren van desen landen. Op dese tijt lieten die van Delft den capitein Wytenhorst uuter gevanghenis, behoudelick dat hi goet ende ghetrouwe den lande van Hollant bliven soude. Op Heilich Cruysavont hierna in die Meye, quamen IIII scepen gheseylen voir dye Wijck opter Zee, ende maecten een lantganghe int dorp, want si een scip aftervolcht hadden; ende tselve dorp moste hem gheven III C Rynsche Gulden van brantscattinghe, oft si woudent gebrant hebben. Ende vandaen togen si int dorp te Petten, ende branden dair des scouten huys, ende namen mit hem al dat si crigen ende plonderen mochten; ende dit was al te samen een vergairt volc, sonder enich capitein of hooftman van namen, ende op hair selfs geley, op winsel ende verlies. Opten IIII dach van meye hadden die knechten van Rotterdam een scermutsinghe voir die stede van Scyedamme teghen den knechten die dair inne laghen ende sloegen malcan-

[p. 402r]

³⁵⁹ deren vele volck of. Ende corts dairna togen die van Rotterdam binnen den dorpe van Abbenbrock, ende pilgeerdent ende deden veel scaden dair omtrent van roven ende branden. Ende op dese tijt was een bestant gecondycht tusschen den steden van Hollant ende den heer van Montfoorde durende tot Sint Jacobs dage toe, behoudelic dat niements des anders aerde roeren en soude. Mer ten duerde niet langhe. Hierna, opten IIII dach van junio, togen die van Rotterdam uut mit macht te scepe die Lecke op, nemende mit hem vele poorters, die zommighe menende dat si om vitaelge trecken souden; dander seyden dat si een blochuys opslaen souden op die Lecke. Die van Dordrecht, van der Goude, van Scoenhoven ende van Scyedam dit vernemende, sijn hem snellicken ghevolcht mit veel scepen, ende quamen an malcanderen, dair seer ghevochten wert ende scermust; mer int einde behilden de³⁶⁰ IIII steden de overhant. Dair werter wel omtrent vierdalf hondert gevangen ende vele geslaghen, ende noch meer verdrancker, ende veel die op tlant comen conden, liepen ewech. Ende die gevanghen worden tot Dordrecht binnengebrocht. ³⁶¹ Ende dye van Rotterdam verloren op de tijt XIIII barcken of scepen, III buchen, II carvelen; ende een baerdse vol volcs worter in die gront gezeylt. Ende op dese tijt was die stadthouder mit veel scepen uutgetogen voir dat blochuys dat dye van Rotterdam opgeslagen hadden opt hoefden voir die stede, mer hair opset ende anslach en verging niet wel, want si verloren een carveil vol volcxs, sonder yet anders te doen. Dit spil³⁶² ende oorloge van Rotterdam dus hangende, is here Reyer van Broechusen, ridder, mede binnen Rotterdam gecomen, ende wert oec gemaect een van den³⁶³ oversten capiteinen. Dese heer Reyer is op een tijt uutgetogen mit een deel knechten, ende quamen voir de stede van der Goude, ende branden dair vele husen buten dye poorten staende; ende hadden die wint op die stede gestaen, als si niet en dede, twair gescepen gheweest grote scade te gescien in der stat. Ende quamen tot voir an die baelgen van der poorten, ende deden veel quades, ende togen ten lesten wederom, sonder yet anders bedreven te hebben.

359 De pagina's 402r t/m 204v, 406r t/m 407v wijken in A en B van elkaar af wat het zetsel betreft; inhoudelijk zijn zij precies gelijk. Zie Tilmans, Aurelius en de Divisiekroniek, p. 172.

360 aldus A; die B.

361 aldus A; binnnengebrocht B.

362 aldus A; spiel B.

363 aldus A; van de B.