Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die knechten van Rotterdam dye van Delft ter nedertogen in een scermutsinge, ende hoe si die stede van Sinte Geertenberge creghen.
Dat LXIIII capitel.

Opten VI dach in maerte hebben die knechten van Rotterdam dat dorp van Ouderscye ingenomen, want dair lach van tselfde geselscap die tScyedam gelegen hadden, als Ghelresse, Cleefse, ende ander, dyet hemluden mit wille opgaven. Ende dieselfde ruters liepen terstont in die Ketel, ende branden dair vele schone husen ende woningen, dair dye van Delft groten scade of hadden. Die van Scyedam verhoirden dat si Oudescye quijt waren ende hem ofgelopen was, sijn terstont mit alle hair knechten ende poorteren darwerts getogen, meende hemluden dat weder of te lopen. Mer si en bedreven niet. Die van Delft vernemende, dat Oudescye ingenomen was, meer quaets verduchtende, omdat si hem soe nabi quamen, ende oec siende den brant ende tverlies van dien, so is de scout van Delft ter poorten uutgegaen mit veel van den poorteren, zonder enige ordinancie te houden; want si meenden de van Scyedam te ontsetten ende te hulp te comen tot Oudescie. Mer si quamen te laet. De knechten dit siende, hebben se wel bi laten comen, ende zijn hem tegen gegaen, so dat dander wikende worden, so datter wel omtrent vijftich verdroncken ende gheslagen worden. Ende dit ghesciede in Polrevairt. Ende cregen wel C ende L goeder poorteren ghevangen; ende dye scout quam in scine van een lantman wech. Mer een van sijn sonen werter verslaghen. Dye knechten dese victorye hebbende, quamen terstont voer dye stede van Delft, ende branden an dye sijde alle die husen ter poorten toe, ende sijn ongescent weder na Rotterdam gekeert. Ende deden voert meer veel quaets in Delflant ende Maeslant van plonderen ende roven,

[p. 401v]

ende namen grote brantscattinghen van den dorpen dair omtrent. Ende de van des sGravenhage mit Haghe Ambocht mosten oeck ten lesten brantscattinghen geven, ende saten lange tijt in verdinghe. Ende die ghevangen van Delft hebben hem ten lesten moeten coepen ende lossen bi groter rantsoenen ende zommen van penninghen. Ende dair wert op dit passe starc getracteert tusschen die steden van Hollant ende tusschen Rotterdamme ende Montfoerde; mer dair en quam nyet of. Ende op dese tijt quam heer Jan van Egmondt, stadthouder van Hollant binnen der stede van der Goude, ende nam dair vijf mannen van den kerchove ende dede se onthoefden, dair die kercke langhe tijt om interdict ende in den banne was, so datter vele poorteren uuter stede liepen van vresen hairs lijfs; mer si worden weder in gheboden te comen. Ende op dese tijt en stont niet wel binnen der Goude. Omtrent X daghen hyerna quamen die knechten van Woerden ende sloeghen dye Goutse sluse an stucken, soedatter in langhe tijt gheen scepen doir en voeren. Dairna, int leste van dye maert, is heer Jan van Naeldwijck, ridder, mit een deel knechten uut Rotterdamme ghevaren, ende quam voir die stede van Sint Gheertenberghe, ende namen dye stede in, want se die poorters niet seer uut en keerden. Ende hebbent bebolwerct ende starck ghemaect, in meninghe hem dair te onthouden. Dye van Dordrecht ende Scyedamme dit vernemende, maecten hem starck om dese knechten dair weder uut te slaen; mer sij en bedreven nyet. Ende in die Heylighe Weke toghen die knechten van Sint Gheertenberge int lant van Breda om te roven. Dye drossaet van Breda vergaerde terstont mitten dorpen, ende maecten een clocke gheslach, ende ghinghen desen knechten teghen, dair si een scarpe scermutsinghe teghen hadden, so datter zommighe gheslaghen worden ende vele ghevanghen, die hy meest mitten swaerde dede rechten. Ten lesten worden dese knechten by composicye mit een somme van penninghen uuter stede van Sint Gheertenberghe ghecoft; ende dese penninghen gaven die van Breda mit haer ommegheseten, want si verduchtende waren die coemste van den hertoghe van Sassen, dye een grote vergaderinghe van volcke maecte, ende groot ghereetscap om Sint Geertenberghe te belegghen, ende souden mits die grote benautheyt ende andere scaden int lant van Breda hyerdoir vercreghen hebben. Aldus vonden si dese manier, dat se dye knechten uuter stede creghen.