Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat desen twist ende discoorde continueert wert ende daerna ghesoent ende verenicht wert.
Dat LVIII capitel.

Dese twist ende oerloge dus hanghende tusschen den prince ende tlant van Vlaenderen, heeft here Phillips van Cleve, here van Ravenstein vergadert uuten name des hertogen Maximiliaens een deel knechten te paerde ende te voet, ende heeft heimelike lagen gheleyt omtrent die stede van Oudenaerden omme mit listen in te crigen tot behoef des princen. Dese knechten daer dus heimelicken bestelt wesende, is hij met weynich dienres ghecomen voer die stede, in manieren van valckenaers, soekende haer valcken in die stede, die hem ontvlogen waren. Die ander die in der laghen gheleyt waren, siende dat si in die stede waren gecomen, spronghen op ende volchden hemluyden snellicken na, ende namen also die stede in; ende die prince dede se mit sinen volke besetten. Hierna, opten XX dach van Zelle, hadden die Vlamingen ende Brabanders eene schermutsinge tesamen in den dorpe van Wilsick op die Scelt, daer dye Brabanders omtrent CCCC man verloren ende ofgheslagen worden, ende meest van den ondersaten des graven van Nassouwen. Op dese tijt was binnen der stede van Den Bossche een vroem man ter wapenen, genoemt Martijn die Swart, ende was een scoemaker. Dese hadde die prince om sijnre vromicheits willen ridder gemaect. Dese here Martijn de Swart, als een capitein ende hoeftman van den prince, is mit sine knechten ende zoudenieren getoghen in Vlaenderen ende creech met listen dat stedeken van Nynoven, verslaende ende verdrivende dat garnisoen van den Franchoysen die daerbinnen waren, ende

[p. 397r]

spolieerde ende beroefde dat stedeken, ende lietet ledich staen. Die van Ghent dit vernemende, senden terstont haer soudenieren in groter menichten ende begrepen dat stedeken ende hebben dat mitten poorteren ende ingeseten wel vast bebolwerct ende besettet. Dit geschiet wesende, hebben die van Antwerpen vergadert mitten marcgrave alle die knechten die si crigen mochten, ende toghen mit groter macht voer dat blochuys, dat die Vlamingen opgeslagen hadden op Cloppersdijck bi Saftingen op die Scelt, ende assaulleerden ende bestormden dat dagelicx mit scyeten ende werpen, ende omgravende hebben sijt ten lesten gewonnen ende destrueerdent ende brakent ten gronde toe of, ende vingen alle die Vlamingen ende knechten dye si daerop vonden; ende daer wasser oec vele int bestormen verslagen, onder diewelke dat mede verslagen bleef Baldewijn, die outste soen heren Anthonis van Hoechtwoude. Daerna heeft die grave van Steenbergen, here Anthonis die bastert een tractaet gemaect van payse tusschen den hertoge ende die stede van Brugge. Ende die hertoge quam in der stede mitten grave van Nassouwen ende mittet meeste deel van sine knechten ende soudenieren opten XXI dach van junio; ende dairbinnen wesende heeft hi vele van den rebellen poorteren doen vangen ende rechten mitten swaerde, ordinerende ende settende die regenten ende wethouders van der stede na sijns selfs sinne ende behagen. Ende den grave van Winchester, here van Gruythusen, sant hij gevangen tot Mechelen, dien hi namaels in genaden nam, ende lieten vry gaen daert hem beliefde. Dit vernemende die van Ghent, dat si mitten hertoge verenicht waren ende pays hadden ghemaect, sijn oec ter ghenaden gecomen doer minlicke composicie des graven van Steenbergen, here Anthonis; want hi om des willen in Vlaenderen gecomen was. Hierna XIIII dagen, als de hertoge mit groter staet ende volc van wapenen treckende was na dye stede van Ghent, is hem te moete gereden dye voornoemde grave van Steenbergen, mitten oversten ende machtichsten van Ghent, brenghende mit hem, sittende op een paert, die jonghe edele hertoge Phillips van Bourgondien; denwelken die hertoge Maximiliaen siende uutermaten blide was, want hi hem in lange nyet gesien en hadde; ende comende aldus binnen Ghent, nam hi die ingeseten in genaden. Ende siet! Omtrent den avont quamen sommige rebelle ende licht volc, ende inciteerden den poorteren ende anderen hem stellen in rebellicheit tegen den prince, sodat hi in groter perikel ende vrese sijns lijfs was. Mer des princen volc liepen terstont int harnas ende resisteerden ende wederstonden desen rebellen, dat si achterwerts dreven ende verwonnen, van denwelken datter vele gevangen ende onthoeft wert. Doen annulleerde ende casseerde die hertoge alle die privilegien, hantvesten ende vryheden dye die van Ghent hadden, ende dede se te nyete, ende nam sinen soen, den jongen hertoge Phillips, ende deden brengen tot Mechelen totter ouder vrouwen van Bourgondyen, hertoge Kaerls wedue. Op dese tijt versoenden ende verenichden hem mitten hertoge here Adolf van Cleve, here van Ravenstein; die grave van Romont; die here van der Vere ende here Phillips van Beveren. Ende corts daerna nam dese here van Beveren tot enen gheechten wive here Wolferts outste dochter van der Vere, daer grote feest ende triumphe of gehouden wert.