Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van een grote twist ende gescille die geresen is tusschen hertoge Maximiliaen tegen den steden van Ghent, Brugge ende tgehele landt van Vlaenderen.
Dat LVII capitel.

Hiervoer heb ic gescreven hoe dat dye Vlamingen uuten bevele des conincs Lodewijcs van Francrijc als een leenheere den jongen hertoge Phillips in allen steden van Vlaenderen ontfangen ende gehult hadden voer enen prince ende grave van Vlaenderen, ende hadden hem tot des lants profijt ende oerber constitueert ende ordineert IIII voechden. Die hertoge Maximiliaen, van Uutrecht in Brabant comende ende dit verhorende, was des sere gestoert ende bedroeft, dat hi mits desen sinen soen ende tlant van Vlaenderen derven most, ende hilt hierop dicwils scharpen raet ende advijs mit sine secrete raden, hoe ende in wat manieren hi dat lant van Vlaenderen weder tot sijnder obediencien brengen soude mogen. Ende om dit te volbrengen, so waren hem sere inducerende die grave van Nassouwen ende die here van Gaesbeeck, mit alle die gebannen poorters van Ghent ende Brugge. Desen twist geviel oec mede overmits den lange marcten van Antwerpen ende van Bergen, die tegen tgemeen goet van den lande so lange alle jaren uutgestelt worden, ende oec in prejudicie der marct van Brugge. So worden die III leden van Vlaenderen ten versoecke van die van Brugge also beraden, dat si een starc blochuys deden opslaen op Cloppersdijc op die Scelt bi Antwerpen, dwelc si versagen mit vrome mannen van wapenen, mit bussen ende andere instrumenten ende artelrye, ende voert wes hem van node wesen mochte, om te beletten dat die scepen ter marct niet comen noch wederkeren en mochten, ende beroofden die bi wylen, doende den coopman grote onverwinlike scade. Mer dye van Antwerpen deden dairtegen maken geleyscepen ende baerdsen, daer si haer stromen mede vriden ende den coepman bescutten; ende hadden dicwils grote ende scarpe scermutsingen tegen malcanderen, slaende ende vangende, doende veel quaets. Dit aldus staende, heeft die hertoge in die Vasten vergadert al heimelic veel volcs, om mit listen in te nemen die stede van Brugge. Mer die van Brugghe dit vernemende, hilden hem mit subtijlheden weder uuter stede, ende vingen vele van den poorteren, die si suspect hilden van desen opsette wetende, van denwelken sy er VII deden onthoefden ende vierdelen als verraders ende meutmakers; ende mits desen is den twist tusschen den prince ende tlant van Vlaenderen altijt groter ende meerder geworden. Die Hoechtijt van Paesschen overleden wesende, is uut Francrijc nedergecomen die edele ende vrome here Antonis de bastert, grave van Steenbergen, hertoghe Phillips bastertsoen, voecht op de tijt des jongen coninc Kaerls van Francrijc, gesonnen van den voorscreven coninc ende sinen rade om desen twist ende discoorde terneder te legghen tusschen den prince Maximiliaen ende dat landt van Vlaenderen. Mer lacen! was te vergheefs ghearbeyt, want elck inne tsijne seere opinieus bleef, waeruut den lande groot schade ende hinder toeghecomen ende ghevallen is.

[p. 396v]

Daerna heeft die hertoge mit subtijlheden ghecregen die stede van Denremonde, ende besette die mit sijn volcke, int welcke innemen van der stede verslagen bleef die jonge grave van Shoerle, genoemt Aelbrecht, des hertogen neve, daer hi seer droeve om was, ende vielen voert dagelixs vele scermutsingen ende mangelingen tusschen beyden partyen, doende malcanderen grote scaden mit slaen ende vangen ende den armen lantluden verdervende. So is oeck here Jan van Ranst, marcgrave van Antwerpen, op eenre tijt mit vele knechten ende soudenieren getrocken int lant van Waes in Vlaenderen, stichtende roef ende brant, ende nam vele van den armen lantluden ghevangen, ende verbrande vele dorpen ende scone woningen ende husen, ende nam mit hem alten groten swaren goet van beesten ende anders dat si daer vonden, ende quamen weder ongescent binnen Antwerpen.

Doe stelden ende ordineerden die Vlamingen capiteinen ende hooftmannen, als den grave van Romont, des conincs oem van Francrijc, here Phillips van Crevecuer, here van Cricki, here Phillips van Beveren³⁵⁰, here Anthonis die bastertsoen mit meer andere edele ende vrome mannen, ende vergaerden wel XXIIII M cloecker mannen, ende quamen int lant van Brabant, stichtende roof ende brant, ende verdestrueerden ende verwoesten bi die stede van Brusel een starc slot ende die gehele heerlicheit des heren van Gaesbeec, ende quamen tot voer die poorten van Brusel, daer si een scermutsinge hadden tegen die knechten die binnen der stede lagen, dien si veel volcs ofsloegen. Die hertoge hadde gaerne die ingeseten ende poorteren van Brusel uuter stede gebrocht ende geleit, om desen Vlaminghen te bestriden, mer si en wouden uuter stede niet. Ende als die Vlamingen vele husen ende woningen omtrent dye stede ghebrant ende verwoest hadden, togen si mit zege weder in Vlaenderen.

In dit jaer van LXXXIIII, omtrent Sinte Lucas, quam die abt van Marienwaerde by Culenborch van der Premonstreyten oerde, ende begreep mit sine heren ende broederen binnen Haerlem dat cloester daer Sinte Anthonis heren in te wonen plegen, welcke cloester die Regulieren des Capitels van Syon omtrent V jaer beseten hadden. Ende dese Reguliers wilen eer broeders van der Derder Oerde Sinte Franciscus gheweest hadden, ende hadden dit cloester van Sinte Anthonis omtrent LXX jaren gheleden ghefondeert ende ghesticht.

350 benueren AB.