Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die stede van Amersfoert beclommen ende ghewonnen wert.
Dat LVI capitel.

Int jaer ons Heren M CCCC LXXXIIII waren op dese tijt sommige ballingen (die over III jaren uuter stede van Amersfoert verjaecht ende verdreven waren) binnen der stat van Uutrecht, ende maecten al heimeliken een conspiracy ende verbandt mitten knechten ende zoudenieren van Uutrecht, om mit cloecheden te overvallen ende in te nemen die stede van Amersfoert. Ende sijn gecomen mit joncheer Jan van Wassenaer, here Phillipssoen ende mit een edel hoeftman genoemt Quintijn, mit een deel knechten, voer die stede van Amersfoert, op Sinte Vincentendach; ende also die graften van der stede al hart bevroren waren, ghingen si daerover, ende clommen mit ladderen over die mueren, tot CCCC man toe; ende namen also die stede in, sonder yemant te misdoen. Mer si vingen een edel man, genoemt Gherrit van Voern, dye mit here Reyer van Broechusen dye stede van Leyden hadde helpen beclimmen, ende wert binnen Leyden gevoert ende daer onthoeft opten VII dach van Zelle. Die andere overste ende machtichste van der stede liepen uuter stede na tlant van Cleve oft van Ghelre ende salveerden hoer lijf, so datter luttel doden bleven.

Also here Joest van Lalleing, stathouder, voer die stat van Uutrecht jammerlic dootgescoten was, so versochten die steden van Hollant an den prince om enen anderen stathouder te hebben, geboren uuten lande van Hollant ende Zeelant, na tenoer van hoerre laester vercregen privilegien, soedat die prince ten versoecke van den steden geordineert ende gestelt heeft here Jan van Egmondt te wesen stathouder van Hollandt, Zeelant ende Vrieslant. Ende hierna, opten tweden dach van aprille, wert hi gehult ende ontfangen voir enen here der steden van Purmureynde met sinen toebehoren, welke heerlicheit van Purmureinde hi gecoft hadde van here Baltaser van Wolkenstein, dient van den hertoge vercregen hadde; ende die hertoge bi confiscatien benomen hadde den here Jan, burcgrave van

[p. 396r]

Montfoerde. Daerna, in den maent van meye, heeft die voornoemde here Jan van Egmont, stadthouder van Hollandt, Zeelant ende Vrieslant getrouwet tot enen gheechten wive vrouwe Magdalene, des graven dochter van Waerdenburch uut Hoech-Duytslant, dair grote feest ende triumphe gehouden wert in des Gravenhage op thof.

In ditselve jaer heeft heere David van Bourgondien institueert ende ingeset feestlic te vieren over al sine Sticht van Uutrecht die Hoechtijt van der Presentacien der glorioser Maghet Marien in den Tempel, dyewelcke hoechtijt men vieren ende houden sal opten XXI dach des maents van november.

In dit jaer van LXXXIIII was in Hollandt gebrocht een levende olifant, ende wert gebrocht van dene stede in dandere, daer dyeghene dyen hadden, groot swaer ghelt mede conquesteerden. Ende als hi van Amsterdam ghevoert wert te scepe om na Uutrecht te reysen ende si hem voer Muden opscepen souden, verdranck hi, mits datten sinen meester selver versuymde, daer hi al te droevich om was.