Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dye jonge prince hertoge Phillips van Bourgondyen int lant van Vlaenderen ghehult werdt.
Dat LV capitel.

Also voer geseyt is dat joncfrouwe Margriete, des hertogen Maximiliaens³⁴⁷ dochter by tractate van payse ende by consente der landen overghebrocht was in Francrijcke by den coninc tot behoef sijns soens den dalphijn; ende waren malcanderen met ryper deliberacien versekert, ende soude oeck dat huwelijck ghoet ende van waerden

347 Maximimiliaens AB.

[p. 395v]

wesen, als voorseit is. So beval die coninc den ambassaten ende gedeputeerden der voirseyder landen, dat si den jongen hertoge Phillips ontfangen ende hulden souden tot horen rechten hertoghe ende grave van den landen hem van sijnder moeder vrouwe Marie anbestorven ende gheerft wesende. Mer niet langhe hierna, die coninck wert oflivich op Sinte Bertelmeesdach apostel.

Op dese tijt lach die prince Maximiliaen tot Antwerpen ende bereyde hem om te trecken ende te beleggen die stat van Uutrecht. So sonnen die Vlamingen als Ghent, Brugge ende Yperen mitten anderen steden ende edelen van den³⁴⁸ lande enige gedeputeerde totten prince, begerende ende versoekende an hem dat hi wilde comen in Vlaenderen, te anhoren den commissie ende den bevelen des conincs³⁴⁹ van Francrijck, ende daerof te tracteren tot des lants profijt, oerber ende welvaren; mer die prince, willende aftervolgen dat hi den Hollanders beloeft ende toegheseyt hadde, toech van Antwerpen ende beleyde die stadt van Uutrecht als voorseyt is. Ende alsoe dat belegge ende dit oerloge lange duerde, soe hebben die Vlamingen genomen den jongen prince, hertoge Phillips, ende hebben hem gehult ende ontfangen in die steden van Ghent, Brugge, Yperen ende voert in allen anderen steden ende plecken des landts voir eenen grave ende here van Vlaenderen, out wesende V jaren ende II maenden. Ende hem worden gestelt ende geordineert IIII voechden, als die grave van Romont, coninc Kaerls van Francrijcs oem, van sijnder moeder wegen; here Adolf van Cleef, here van Ravenstein; here Wolfert van der Vere, grave van Grotevelt; here Phillips van Beveren; here Anthonis, die basterts soen.

Int beghinsel van desen jare van LXXXIIII wert here Balthasar van Wolkenstein, des hertogen Maximiliaens neve, jammerlic vermoort ende dootgeslagen van een sijnre dienres uut Hoech Duytslant, om twistende ende scellende woorden dye si te samen hadden; ende geschiede binnen der stede van des tsHertogenbussche. Ende liet II broeders after, als joncheer Vitus van Wolkenstein ende meester Jorijs, doctoer in den rechten.

348 vannden AB.

349 conics AB.