Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die pays gemaect wert tusschen coninc Lodewijc van Francrijc ende hertoghe Maximiliaen ende sine landen.
Dat XLVII capitel.

In die maent van junio, int selve jaer van LXXXII, quam een heraut van den coninc Lodewijc van Vrancrijc, die XI van dier namen, in Vlaende-

[p. 390r]

ren³³⁵, brengende saveconduyt voer LX personen om mit hem te tracteren van payse, die gecoren worden van den meesten in beiden staten, gheestlic ende wairlic. Ende si togen totten coninck van Vrancrijc, die se vriendelic ontfing. Ende also hy mit allen cranck was, socht hy alle remedien ende succours om gesont te werden. Want hy sandt onser Lyever Vrouwen ten Halle een gulden hert, gepresen voir VII M ponden, ende der abdyen tot Sinte Adriaens te Geersbergen sant hi tot fondacien van eenre cappelrie VII M gouden cronen mitter zonnen. Ende van tbeghin der maent novembris begonnen die gedeputeerde van den hertoge, mitsgaders den III leden van Vlaenderen ende den III Staten van Brabant mitten commissarisen van den coninc te tracteren van payse binnen der stat van Atrecht. Ende dair wert, na vele handelinge, woerden ende reden geconcludeert een toecomende huwelic tusscen heer Kaerle den dalphyn, des conincs zone, onder sine jaren sijnde, ende vrouwe Mergriete van Oestenryc, des hertogen Maximiliaens dochter, oudt sijnde omtrent IIII jaren, ende was voerwaerde dat dit huwelic goet ende van waerde soude sijn. Ende onder C ende een articulen de daer proponeert ende opghedaen, ghesloten ende concludeert waren was een, dat dat graefscap van Bourgondien, Artoys, Piccardien, Boenen³³⁶ ende de heerlicheden van Macons, Noyers, mit meer andere articulen in den voorscreven tractaet int langhe begrepen souden comen ende bliven an den Bourgonsen. Dwelc aldus ghedaen sijnde, trocken die ambassatoers van hertoghe Maximiliaen ende die gedeputeerde van den voorseyden drien landen, Vlaenderen, Brabant ende Henegouwen, totten coninc, doen sijnde te Tours, om den voorscreven pays te confirmeren, als heer Jan van Lannoy, cancellier van der Oerden van den Toysoene; dye abt van Sinte Bertijns; Philips, abt van Sinte Peters te Ghent; Goeswijn, abt van Hafflinghen; Willem, abt van Berghen; heer Jan van Lannoy, heer van Rymersborch; Jan van Berghen, heer van Waleyn; Baldewijn van Lannoy, heer van Molenbays; Jan van Bouverie, heer van Wiers, cancellier van Brabant; Pauwels, die Baenst, heer van Mormeselle, president van Vlaenderen, meester Jan Dufay, meester van der requesten, Gerrit Nyeuman, Jan die Beer, secretarijs van den hertoge voorscreven, ende noch XVIII notabel mannen uuten voorscreven drie landen, ende quamen tot Tours bi den coninc, die se allegader minlicken ontfing ende hoechlic begaefde ende dair wert tvoorscreven huwelic mitten payse confirmeert. Die coninc was qualic te passe, ende hadde den dalphijn sinen soen bevolen te bewaren den grave van Bienge, toecomende hertoge van Boorbon, die vrouwe Anne, zijn jongste dochter getruwet hadde. Ende hi dede den ambassaten geven XXX M gouden cronen ende dairtoe vele costlicke silveren scalen, juwelen ende cleynoden. Ende in der tijt als men sprack te tracteren mitten coninc, om die ghedeputeerde te vergaderen tot Atrecht, so en sliep die heer Philips van Crevecuer, heer van Cordes, niet, mer hi belach Aryen mit groter macht ende assaulleerden ende bestormden de stat vreselic mit bossen ende andere instrumenten; ende die capitein mitten garnisoene ende ingeseten weerden hem vroemlic. Doe wert dair bestant gegeven van des smorgens te drie uren tot XI uren. Ende dair wert tracteert ende gemaect dat die heer van Cordes mitten Fransoyzen ingelaten wert ende de stede wert hem overgegeven. Doe liet hi vredelic uutgaen al die wouden, tot V C toe; ende die gingen tot Sint Omeers bi den here van Beveren. Ende de Arien over gaf, ontfing vanden coninc XXX M cronen.

335 Vlaendederen AB.

336 eerste n van boenen beschadigd AB.