Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dye hertoge Maximiliaen als voecht ende momber ghehult wert in desen landen van Hollant ende Zeelant, ende van sommighe perticuliere scermutsinghe die die Fransoysen deden opten landen van Vlaenderen, Henegouwen ende Hollant.
Dat XLV capitel.

Die edele vrouwe Marie van Bourgondien aldus oflivich gheworden sijnde, als voorscreven staet, soe opstelde hem hertoghe Maximiliaen by rade van enigen als voecht ende momber sijnder voerseyder kinderen om tlant te regeren ende te bescermen teghen den Fransoysen, dwelck vele anderen nyet en behaghede: want die van Ghent, Brugghe ende Yperen ordineerden sekere commissarisen om tlant van Vlaenderen

[p. 389r]

te regeren mit hartoghe Maximiliaen totdatter vorder provisie op gedaen ware. Ende dair wert een generale dachvert ghehouden tot Ghendt, ende gheconcludeert ende ghesloten dat men den hertoghe nyet ontfanghen soude voer een heer van den lande, dan tot een sekere termyne ende onder sinen eedt, ende zij en wouden anders ghenen capiteyne hebben, dan by hem beyden gheordineert; ende dat dairomme: want dye sommighe, dye den hertoghe regeerden, deden mit hem dat si wouden, want hy jonc was ende sachtmoedich. Ende grote scattinghen die dye landen gaven, en quamen tot gheenre goeder rekeninghe, wairbi dattet ghemene volc seer verarmt ende byster was: ende dair en wert oeck gheen justicie int lant ghedaen, wairomme datter grote fortsen ende ghewelden ghescieden. Uut welcker voorscreven ordinancye die prince seer beroert sijnde, toech tot Brugghe, ende vandair tot Yperen; mer hy en wert als heer niet ontfanghen, noch dye wetten ende regenten en worden van sijnre weghen niet geset. Ende heer Robbrecht van Halewijn, baelju van Brugghe, wert van die van Ghent ghebannen L jaren; ende meer andere edelen werden van hoer officien ende diensten ghestelt ende regeert, soedat die edelen omtrent dese tijt seer vernedert werden. Ende also die heer van Cordes uut die stat van Terewane ende uut anderen fortressen sijn volc dede lopen int lant van Vlaenderen, doende grote scade van roven ende branden, soe werden dairtegen ordineert ende gescict heer Kaerle van Zavoyen, de here van Beveren ende dye heer van Merwes. Ende die van Ghent sonden dair oec vele volcxs van wapenen te paerde ende te voet. Die bastert van Vienyn versloech op eenre tijt veel Fransoysen voir die stede van Bethunen. Ende dair werden oec vele scepen van oerlogen geordineert ende uutgestelt opter zee teghen den Fransoysen die den Vlamingen, Hollanders ende Zeelanders grote scade deden, dat overmits dien die scade voirt so seer niet en gesciede. Omtrent dese tijt ende int selve jaer van LXXXII track de heer van Chayterain uut die stede van Sint Omers; ende by Monturen gemoeteden hem vele Fransoysen bi der stat van Terewanen, dye vele ghelts brochten, om den volcke van wapenen te gheven, ende betalen hair zoudie, dair hy een scarpe scermutsinghe teghen hadde, sodat hy se verwan ende roefde, ende behilt al dat scat ende ghelt. Terwilen dat dese dinghen aldus in Vlaenderen gehandelt ende tracteert worden, was die hertoghe Maximiliaen in Hollant ghetoghen ende wert in allen steden ende plecken des lants van Hollant, Zeelant ende Vrieslant ontfangen ende ghehult als een recht voecht ende momber der landen uuten namen sinen zone hertoghe Philips, dye doetertijt mer³³² vyer jaren oudt was, doe sijn moeder vrouwe Marie oflivich gheworden was; ende dit bi consent ende wille der heren ende steden van der Cabbeljaus partye, die doe tregiment over al Hollandt hadden.

332 meer AB.