Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die van Uutrecht een anslach ghemaect hadden om die stede van Dordrecht in te nemen ende van een nyewe castelein op tslot ter Goude.
Dat³²⁵ XLIII capitel.

Int eynde van aprille int selfde jaer van

325 Det AB.

[p. 387v]

LXXXII hebben heren ende capiteinen van den Sticht mitten overste van der stadt van Uutrecht raet gehouden mitten ballingen van Hollant, hoe ende in wat manieren si best de stede van Dordrecht souden moghen mit subtijlheden ende cloucheden becrachtigen ende winnen, so hebben si hem voorsien van scepen groot ende cleyn, dair si volck van wapenen in setten, dair capiteinen of waren here Willem van Wachtendonck ende Adriaen van Naeldwijc, ende waren wel VIII C starck ende wel ghewapent, ende sijn die Lecke nederghevaren, ende quamen op enen saterdach voir Dordrecht. Ende also dat ghetije ghegaen was, en mochten si in die stede niet comen ende voeren dye Maze op tot verby Vlaerdingen. Dit hadden die Hollanders scijer vernomen ende souden se bevochten hebben, en haddet teghen den nacht niet ghegaen. Nochtans waecten si alle den nacht ende waren in roere. Ende vele van desen scepen voeren na Zeelant ende dandere keerden weder ende grepen enen moet ende traden opten IJseldijc, ende ghinghen nader Gouden toe; ende dair stont een blochuys opten dijc, dwelck si an brande staken, ende gingen verby, dat si mer een man verloren; ende si worden van dye van der Goude aftervolgt; mer si en deden hem niet. Ende ghenakende die stede van Oudewater, quamen hem tegemoet die knechten ende een deel poorters van der stede, ende dese hadden een scarpe mangelinge te samen, ende sloegen deen den anderen vast volc of; mer de van Oudewatre hadden tmeeste verlies van horen poorteren, dyer veel geslaghen worden. Ende vandaen quamen sy tot voer die stede van Yselstein, dair se oec een scermutsinge teghen hadden, ende quamen dus mit groter avonturen weder binnen der stadt van Uutrecht. Omtrent dese tijt sonden dye steden van Hollant boden an den prince Maximiliaen om in dese landen te comen, opdat doir sine presencye ende bevelen dat gemeen volck te bet tot exactyen ende scattinghen ghebrocht mochten worden. Ende comende in dye meymaent in Den Haghe, wert dair een generaele dachvert ghehouden van alle den edelen ende steden des lants van Hollant ende Vrieslant, ende daer wert onder andere saken concluderet ende ghesloten dat grave Engbert van Nassouwen sine officie van den casteleynscap resigneren ende overgheven souden in des princen handen voir een somme van penninghen dye hy dairvoir soude willen eysschen, dat alsoe ghescyet is. Ende alsdoen constitueerde ende sette dye prince tot enen casteleyn heer Jan van Cats, ridder, dien si over vijf jaren refuteert hadden ende niet hebben en wouden.