Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat heer Vincent van Swanenburch, ridder, mit subtijlheit creech die stede van Vianen.
Dat XLII capitel.

Dit oorloge tusschen dat Sticht ende tlant van Hollant gedurende, heeft hem seer neutrael tusschen beyden gehouden ende niet gemoyet joncheer Walraven van Bredenroede, die doe noch jong was, ende hadde in der stede van Vianen ordineert een castelein als Jorijs, des domproesten bastertsoen van Uutrecht, die seer naerstich ende scarpelic sijn officie ende dienste bewaerden. Soe was op dese tijt in der stede van Vianen een man gheheten Ghijsbert Baess, dye alle weech groten twist ende partie gemaect hadde tusschen heer Reyer van Bruechusen ende vrouwe Yolente, des joncheren moeder van Bredenrode; ende dese Gijsbert faveerde seer die van Uutrecht tegen den Hollanders. Dit vernemende heer Joest van Laleing, die stathouder, begerede herteliken op sine neve, den joncheer van Bredenrode, dat hi desen Ghijsbert een wijl tijts uuter stede van Vianen bannen wilde. Ende dit screef die joncheer sinen castelein Jorijs die bastert, ende dede voert den weet aen den voorscreven Ghijsbert Baess, die terstont dye stede ruymde ende quam tot Uutrecht. Ende concipierde ende opnam alsdoen die stede van Vianen te winnen ende onder die van Uutrecht te brenghen: ende heeft genomen heer Vincent van Swanenburch mit een deel burgheren ende knechten, ende quamen in der nacht voir dye Culenburchse poort, ende clommen dair over die muren, ende quamen mit groten geruchte in der stede, ende lyepen van stonden an na dat slot, ende quamen in dat voerburcht. Jorijs die bastert, dit vernemende, liep snellicken op een starcken toern, gheheten Simpol, ende meende hem ende dat slot dairuut te bescermen. Mer si benauden³²⁴ hem so seer mit scieten ende mit roeck ende brandt, dat hij dat slot opgaf nadien datter een groot deel van den borchsaten dootghescoten ende verslaghen waren; ende aldus wan heer Vincent dat slot mitter stede. Ende hy ving dairbinnen vele van den burgheren van Uutrecht, die uuter stadt verbannen ende verdreven waren, ende sant se binnen Uutrecht gevangen. Ende si pilgeerden ende plonderden dat slot ende dye stede, ende nament al datter was. Die stat van Uutrecht was desen heer Vincent van Swanenburch sculdich een grote zomme van penningen van sine soudie; ende aldus nam hi voer hem uut de stede van Vianen niet te trecken noch die over te geven, hi en ware eerst voldaen ende betaelt. Ende bleef in dye stede van Vianen legghen langher dan IIII maenden, waeromme dat de Hollanders tlant van Vianen ende van der Ameyden seer destrueerden ende verwoesten, ende leyden menige lagen om de stede weder te recupereren ende inne te nemen. Ten lesten wertet gedadingt ende de joncheer van Bredenrode most hem geven VI M Rynsche gulden; ende dairmede ruijmde hi die stat ende de joncheer van Bredenroede quam weder in der possessien ende besitten van zijn slote ende stede, ende bleef dair voertan selver regerende ende bewarende sine slot ende stede selver in persone.

324 benaudem AB.