Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dese cappeteinen wonnen dat starcke dorp van Emenesse.
Dat XXXIX capitel.

Die stadthouder ende die ghemeen steden van Hollant vernemende hoe dat dye stede van Naerden pilgeert, gheplondert ende beroeft was³²⁰ van allen dynghen, waren des qualicken te vreden, ende aviseerden ende overleyden hoe zij best die feyt ende scoffiericheit wreken mochten; wairom dat die stadthouder mitten marcgrave ende Zalizaert vergadert hebben een grote menichte te paerde ende te voet, ende sijn getoghen binnen Naerden, ende togen voirt int Stichte, rovende ende brandende vele scone dorpen, hofsteden ende woninghen, ende namen groten rove mit hem. Ende alsoe twinter was, so worden grote garnisoenen gheleyt binnen Yselsteyn, Oudewater ende Woorden. Binnen Wezup worden hondert knechten gheleyt, ende Zalizaert ghing legghen binnen Naerden, ende branden tot voer dye poorten van Uutrecht buten die Tollesteghe. Ende dair en bleef niet staende daer si enichsins aen comen mochten, uutgheseyt een starcke plaetse ghenoemt Emenesse, wetende dat dair binnen veel goets, scats ende beesten ghevlucht waren, omme sijn starckheyts willen. Ende dit dorp Emenesse was een mile lang, ende hadde niet dan een inganck ende een uutghanck, op beyden eynden, ende hadden hem oec wel versien van vrome knechten van Uutrecht ende Amersfoert, ende voert van bossen ende andere instrumenten ende artelrije. Ende was gheleghen in een moerich ende veenich lant, dat al verdolven lant was vol putten ende graven. Dit niettegenstaende, die stathouder, mit Zalizaert³²¹ ende dander cappeteinen, sloten mit malcanderen dit dorpe van Emenesse te overvallen mit macht of dairvoir doot te bliven. Ende quamen op een tyde ende bestormdent mit geheelder macht tot vele diverse plaetsen gelijc, sodat sijt int leste mit geweldigher hant machtich worden ende wonnen, ende slogent al ter doot dat si dair vonden, ende plonderden ende beroefden dat dorp van alle dat si dair vonden ende staken ten lesten dat vyer in ende verbrandent.

320 aldus C; ontbr. AB.

321 l van zalizaert niet goed leesbaar AB; i ook niet in A.