Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die van Uutrecht de stede van Nairden mit subtijlheden wonnen ende pilgeerden.
Dat XXXVIII capitel.

Die van Uutrecht, dye seer wel gemoet ende gestarct waren van dese victorien, tracteerden dagelixs hoe si best enige steden oft sloten in den lande van Hollant in crigen mochten. Ende hebben raet ghehouden mit die van Amersfoert omme die stede van Naerden in te crigen mit enige subtijlheden ende cloucheden, ende hebben zommige van den cloucsten ende stoutsten van den horen uutghemaect, diewelken hem vermaten dat te doen. Ende sijn gecomen in der nacht omtrent die stede ende verborghen hem tot vele heimelike plaetsen. Des margens, als dye zonne op gegaen was, stonden van desen knechten IX of X voer die poorte, gecleet in vrou-

[p. 386r]

wen clederen, hebbende manden an den arm, alsoft si ter marct hadden willen gaen ende doen hair comenscap, ende verwachten topgaen van der poorten. Als nu Jacob Jans zoen die burgemeester die doere van der poorten opghedaen hadde ghinghen dese inwerts, ende bestonden terstont te scermutsen teghen die van binnen. Dit siende ende horende die verborghen lagen, stonden terstont op uut horen laghen ende liepen ter stadtwert, ende wonnen die stede. Dair geviel een harde ende scarpe scermutsinge tusschen den poorteren ende den knechten, sodatter omtrent XL poorters verslaghen worden; sommige op tkerchof ende ander in die kercke. Ende dander verberchden hem dair si konden ende mochten. Terstont senden dese knechten boden uut tot die van Uutrecht ende Amersfoert, dat si comen souden ende besetten de stede mit hair volc. Mer dese boden worden onderweghen gheslaghen, sodat si gheen bootscap ende tidinghe dair of en creghen, niet wetende hoe dattet vergaen was. Dye knechten, dye hier niet of en wisten dat dye boden geslagen waren, meenden dattet dye van Uutrecht ende Amersfoert verachten of niet wairt en dochte te wesen, hebben vergadert alle die lantluden dair omtrent gheseten ende ander, de waghens ende paerden hadden, ende dwonghen dye mit alle den roof die si dair namen van huysraet ende anders, om binnen Uutrecht te brenghen. Doen pilgeerden ende beroefden si die stede van allen huysraet, koern, beesten ende alle dat si dair binnen vonden, ende dedent tot Uutrecht brenghen ende wouden die stede an gesteken hebben, en hadden si den knechten niet belooft ghehadt een grote somme van penninghen te gheven tot sekere terminen. Ende lieten die stede onghebrant, nemende mit hem C ende XL personen tot onderpande ende borchte.