Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die van Uutrecht joncheer Engebert van Cleve ontfinghen ende hulden tot een momber ende voecht des Stichts ende van een grote victorie die de Hollanders hadden op die van Uutrecht op Sinte Stevens dach.
Dat XL capitel.

Als dit oerloge tusschen dat Sticht ende Hollant dagelicxs quader ende arger wert, soe hebben de van Uutrecht gezonnen hoir gedeputeerde an den hertoge Jan van Cleve, biddende ende begerende tot een voecht ende momber te hebben sinen broeder joncheer Engelbrecht tegen den biscop David van Uutrecht, ende heeft zijn consent

[p. 386v]

dairtoe ghegeven. So is dan dese joncheer Engelbrecht binnen der stat van Uutrecht gecomen opten Heyligen Karsavont, mit heer Reyer van Bruechusen; heer Dirc van der Horst; heir Wynant van Aernhem ende heer Govert van Scarpenseel, ridderen, ende hebben hem die van Uutrecht ende Amersfoert ontfangen mit groter eeren ende feesten, ende deden hem logeren in des biscops hof bi der Domkercke. Ende vijf weken dairna hebben si hem gehult ende ontfangen voir enen momber ende voecht des Stichts van Uutrecht, doende hem een behoirlicken eedt. Die capeteinen van deser victorien voorscreven verblijt wesende, vernemende dat joncheer Engbert van Cleve binnen der stat van Uutrecht ghecomen was, hebben sij terstont alle hore macht te samen ghebrocht, ende zijn op Sinte Stevensdach gecomen int dorp van Westbrueck, gelegen in die venen, ende staken dat vier dairin om die van Uutrecht te provoceren tot enen stride ende uut hair stat te comen. Dye van Uutrecht dit verhorende ende oec siende van hoere poorten ende toornen, maecten een clocken slach ende liepen mit hair bannier ende doude scutters mit horen Scutterswimpel uuter stat na desen dorpe toe, sonder enige ordinancie oft ordene te hebben, hopende weder victorie te hebben, als si onlancxs dair te voren op die Nyewe Vaert hadden gehadt; mer ten quam so niet alst gheweest hadde. Want Petijt Zalizert hadde hem in heimelicke lagen gheleyt, ende siende dat die van Uutrecht sonder enige ordinancien verby hem passeert waren ende dat si alrede hantsgemeen mitten anderen capiteinen gheworden waren, is hi snellic uut sine lagen opghestaen ende bestont se van achteren te bevechten ende vernyede den strijt weder. Dair geviel³²² een scarpe mangelinge ende scarmutsinge, want si worden van voren ende achteren seer felliken angevochten, ende sceyden hem van een dene hier ende dander dair, lopende over dat velt, wanttet lant ende twater al even hart bevroren was; ende worden vervolgt tot an die poorten van der stede. Dair bleven verslagen boven die M burgers van der stadt, dwelke een grote commoci ende rumoir in der stadt maecte, alst geen ongelijc en was; want enige meenden, hadden si so voirt na der stadt gelopen, dat se hem mitten wikende burgeren die stat ofgelopen souden hebben. Mer die knechten, alst dicwils geboirt, hebben so veel mit vangen ende plonderen te doen, dat si sulcxs niet en achten ende altijt hoir profijt soken. In desen stride worden verslagen Baernt van Everding, burgermeester van der stat, ende Steven van Zulen, mit meer ander erbare rijke ende treflike burgers. Ende heer Vincent van Swanenburch mit meer andere quamen ongescent binnen der stadt, ende dair worter omtrent C gevangen ende worden tot Amstelredamme gebrocht ende swaerlic rantsoneert ende ghescattet. Ende die stadthouder gaf die van Amstelredam die bannier ende scutterswimpel van Uutrecht, ende wert ghehangen in de Oude Kerke. Dairna in den Vasten wert een dachvert gehouden tot Scoenhoven om te tracteren van payse tusschen tlant van Hollant ende dat Sticht; mer eylacen, dair en quam niet of. Ende doe began joncheer Engbert, momber van den Stichte van Uutrecht een nyewe munte te slaen, ende waren genoemt Engbertus Braspeninghen.

322 gevil AB.