Hoe dat die van Amersfoert terneder ghetoghen werden van des biscops van Uutrechts cappeteinen.
Dat XXXVI capitel.
In die maent van september heeft dye biscop van Uutrecht doen vergaderen veel volcx van wapenen, te paerde ende te voet, dair cappeteinen of waren die heer van Yselstein; joncheer Willem van Egmont, sijn broeder; heer Evert van Wilpen; heer Jan van Cats ende Petijt Zalizaert, ridderen, mit meer andere ridderen ende edelen. Dese Petijt Zalizaert was een vermaert ridder ende was van den coninck van Francrijck uut sine goeden ende heerlickheden verdorvenGa naar voetnoot313, ende hadde onder hem vele cloucke mannen uut Gasschoengen. Dese capeteinen sijn gecomen opten XXIII dach van september omtrent die stede van Amersfoert, ende hadden hem ghestelt in twe battaelgen: die ene was ordineert om alle dye beesten uuten velde te nemen ende wech te driven, ende dander hadden hem gestelt in heymelike lagen. Dye van Amersfoert siende dat hair beesten uuten velden geroeft ende wech gedreven worden, liepen int harnas, ende sonder ordinancie ende enige regele quamen si uuter stede ghelopen om dit te keren ende den anderen den roof weder te benemen. Ende als si dye laghe waren passeert, resen die ander op ende quamen van achteren. Ende die ander keerden hem omme ende besinghelden die van Amersfoert alomme, ende bestonden die an te vechten van voren ende van achteren. Die van Amersfoert siende dat si dus van allen sijden anghevochten worden, ende dat hem dye vianden altijt naerder quamen, en wisten nyet oft si vlien ofte bliven staen wouden. Ten lesten worden si vervaert, ende elck sach om wech comen ende sceyden van malcanderen, die ene hier ende dander dair. Ende in dit vlien worter omtrent hondert van den poorteren doot gheslaeghen ende CC ghevangen, dye alle tot Wijck totten biscop ghesonnen werden.
Auteursrechtelijk beschermd