Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe datter een groot orloge geresen is tusscen den Hollanders ende die stat van Uutrecht.
Dat XXXV capitel.

Als die prince een wijl tijts tot Brusel hadde geweest ende die princesse sijn vrouwe genesen was, is hi weder in den landen van Hollant ghecomen ende quam opten XI dach van september in des sGravenhage. Ende dair wert een generael dachvert gehouden van allen den steden van Hollant, ende daer wert tracteert van den toecomende oorloghe teghen die stadt van Uutrecht. Ende als dye prince sach dat si uutermaten seer inclineert ende gheneycht waren totten oorloghe, gaf hy dairtoe sijn consent, want si vermaten hem binnen eenre maent dye stadt van Uutrecht mitten ghehelen Nederstichte tot horen wille te vercrighen. Wairomme dat dye prince van stonden an dye stadt mit allen horen hulperen deden ontsegghen. Dye van Uutrecht dit vernemende, versaghen hem van vele zoudenieren ende knechten ende van allen des hem van node waer. Ende toghen uuter stadt mit groter macht voer dat huys te Nyenrode, dat sij wonnen ende destrueerden. Desghelicken wonnen sij mede dat huys Ten Hamme, dat si oeck seere verwoesten. Ende dat hyeromme: want haer vianden dese sloten besaten ende inne hadden.

[p. 384v]

Die heer van Yselstein hadde dat huys te Eembrugge ghespijst ende versien van knechten ende van alrehande artelrie. Ende dit wonnen si mede, ende destrueerdent op Sinte Lambrechts dach. Dairna, opten XII dach van september, quamen die ingeseten van der stede van Montfoert mit sommige knechten ende stichten roof ende brant int lant van Yselstein. Ende als si mitten roof wederkeren wouden na Montfoert, so wert hem de wech preveniert ende ondergaen van sommighe reysigers ende voetknechten van Yselstein, ende dair gheviel³¹¹ een scarpe scermutsinge, so datter omtrent XXV man gevangen werden. Ende dander werden gheslagen oft ontliepen hem. Ende sij benamen hem mit crachten den rove weder. Op dese tijt hadde de heer van Montfoert grote audienci in der stat van Uutrecht ende dede een uutermaten starck blochuys slaen op die Nyewe Vaert, ende sette dairop cloucke, vrome knechten, ende voirsach dat mit veel vitaelge ende anders dat hem van node was. Dit vernemende die heer van Yselstein vergairde haestelic een deel zoudeniers te paerde ende te voet, ende quam voir dat blochuys, menende hem dat of te lopen ende te winnen; mer si weerden hem vromeliken, ende scoten mit allen seer op die Yselsteinse; ende si sagen dat si dairop niet winnen en mochten, staken si dat vier in sommige husen van dat dorp, ende verbranden dat. Ende aldus so wert dit oerloge van dage te dage arger ende quader, ende deden malcanderen grote onverwinlicke scaden; mer int Sticht worde die meeste scade ghedaen mit sommige dorpen te branden. Int einde van den maent van september track die prince weder na Brabant, dair een grote generale dachvert beroepen ende ordineert was van den machtichsten ende edelsten sijnre landen, om sonderlinghe³¹² nootlicke saken den ghemenen landen angaende.

Item in dit jaer was een grote strijt tusschen coninck Eduwairt van Engelant ende coninck Jacob van Scotlant; ende dair waren enighe ghesonnen uut desen landen Enghelsen te baten. Ende dye coninck van Francrijc hadde oeck veel volcs van wapenen gesonnen over die zee den coninck van Scotlant. Dair wert veel volcxs verslaghen van beyden sijden, mer meest van den Enghelsen, want die Scotten die victorie hadden.

311 gheveil AB.

312 sonderlinhe AB.