Hoe dat die prince onder hem brochte dat lant van Ghelre.
Dat XXXIII capitel.
Als nu dese feest van der Oerden van den Gulden Vlijese geeindet was ende dat dat bestant tusschen den coninc ende den prince ghemaect ende ghesloten, heeft hem die prince bereyt om te trecken op die Gelressen ende dye te brengen onder sine subjectie ende onderdanicheit. Dit vernemende die van Nyemegen, Tijele ende Bommele mit meer andere steden des lants van Ghelre, zijn gecomen tottes tsHertogenbussce, ende hebben hem wijselic beraden ende laten informeren, ende hebben pays ende vrede mitten prince gemaect, ende beloefden hem te hulden ende te ontfanghen voir een hertoghe van Ghelre; dwelc also gesciet is; want die prince is gecomen mit groter macht van volke binnen die stede van Nyemegen, ende si ontfinghen hem mit groter feesten ende triumphen voer enen warachtigen hertoge van Gelre, doende hem hulde ende ede; ende dyergelicken deden doe voert die andere steden van Gelrelant. Doen trac hi tot Remonde om uut dien te bedwingen die ongehoersamheit ende rebellicheit der stede van Venloe; mer si bereyden hem dairtegen om den prince te wederstaen mit alle haer macht. Binnen desen tiden wert een grote bruloft gehouden binnen der stat van Coelen, des sonnendaghes na Sint Jans dach te midsomer, van hertoge Willem van Gulic ende van den Berge, de dair troude ende besliep des marcgraven Aelbrechts dochter van Brandenburch, genoemt Sibilla. Ende tot deser feeste ende brulofte quamen veel groter heren ende vorsten, als de aersbiscop van Coelen; de aersbiscop van Trijer; de hertoge Maximiliaen van Oestenrijc ende van Bourgondien, etcetera; die marcgrave van Brandenburch; die marcgrave van Baden ende veel ander graven, als men meent wel over die L, ende veel vrije heren, ridderen ende knechten sonder getal. Daer wert een costelyc hof ghehouden III dagen lang, mit steken, tornieren, dansen ende anders. Die hertoge van Oestenrijc dede dair grote vromicheit van wapenen, ende hadde den prijs boven alle den anderen. Ende als dese feeste voleindet was, trac hi weder mit alle zijn heren in den belegge voer die stede van Venlo, want hi sijn volc van wapenen dair gelaten hadde in vele plaetsen omtrent de stede, dat si so wel tot horen belieften nyet uuter stede en mochten. Ende als si dus seer van den prince benauwet werden, begeerden si ten lesten des princen ghenade, ende gaven hem op, behouden hoir lijf ende goet. Ende die prince quam binnen der stede, ende wert aldaer gehult ende ontfangen, ende voert in die ander steden diergeliken, voer een heer ende hertoge van Gelre van sijnre vrouwen wegen, die hertoechinne.
Auteursrechtelijk beschermd