Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoghe Maximiliaen een costlick hof hilt van den Gulden Toyson, ende hoe sijn outste zoen Philips ridder geslaghen wert.
Dat XXXII capitel.

Also die jonge Kaerle, heer Adolfs zoen van Ghelre, int hof van Bourgondien bewaert ende gevangen was, ende dye hertoge van Cleve veel plaetsen van den Gelressen inne hilt, so oerloechden dye Gelressen seer opten Cleefsen ende Brabanders. Ende bisonder so deden die van des tsHertoghenbossche groot scade in den landen van Gelre, ende stichten roof ende brant omtrent Bommel ende Bueren. Ten lesten deden die van Den Bossce drie starke blochusen slaen voir dye stede van den Grave, dair si seer of benaut waren, dat si tot Nymeghen niet comen en mochten. Ende so si gheen vitaelge en creghen, gaven si hem ten lesten op in des princen handen, ende wort doetertijt incorporeert mit Brabant, alsoet een out leen van Brabant is. So bleven nochtans die Gelressen seer opinieus³⁰⁷, ende vervreemden hem al gheheel van den huse van Bourgondien, ende en wouden des princen rechteren ende officeren niet meer ontfanghen. Wairom dat die prince opghenomen heeft den Ghelressen te bevechten ende onder sine subjectie te brenghen. Ende aleer hy dit bestaen wilde, so heeft hy ordineert ende ingheset dye vermaerde ende triumphelycke feest van der Oerden van den Gulden Toyson of tGulden Vlies, dwelck hy ordineerde in die stede van des tsHertoghenbossce. Ten welcker feeste dat vele ridderen, heren ende andere edelen quamen. Mer van der Oorden des Gulden Toysonsen compareerden niet meer dan ses princen, als die grave van Romondt, des hertoghen soen van Savoyen ende des coninginne broeder van Francrijck; heer Adolf van Cleve, heer van Ravensteyn; heer Engbert, grave van Nassouwen; heer Joest van Laleing, stadthouder van Hollant; heer Jan van Lannoy ende heer Willem, dye oude heer van Egmondt. Dairna quam dair mede vrouwe Marie, hertoechinne van Oestenrijcke, van Bourgondien, etcetera, mit horen enighe soen Phillips, out wesende drie jaer, ende wort dair by beveel des princen van den here van Ravenstein ridder gemaect in die Grote Kercke opten Hogen Altaer. Ende dit ghescyet wesende, wert hy mede aenghenomen in der Oerden van den Gulden

307 opiniens AB.

[p. 383v]

Toyson; ende op dieselve tijt worden die grave Martijn van Polen ende heer Jan van Walein, des heren soen van Berghen an Zoem, mede in der selver oerden ontfangen.

Die prince hadde sijn logijs int cloester van den Jacopinen, dwelke hi seer verbeterde ende repareerde in structuren, timmeraedsen ende milde gaven. Die feeste van der Oerden gedurende, was dair grote triumphe ende bliscap van tornieren ende andere ridderlicke feyten ende oeffeninghen van wapenen. Op dese tijt quam die coninck Lodewijck van Francrijck mit groter macht om Vlaenderen te bevechten ende in te winnen; mer dair wert weder ghesproken van bestande, dwelck also ghesciede. Ende dair wert een bestant ghemaect een jaer lang durende; mer want die comenscap ghenen loep en hadde ende het groten dieren tijt van coern was, so mishagede dat den Vlaminghen seer.