Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat heer Jan van Egmont, heer Willems zoen, dye stede van Dordrecht mit subtijlheden wan ende becrachtichde.
Dat XXX capitel.

Desen twedracht aldus continuerende ende elck sine macht tonende, so hebben die van Leyden seer naerstelic solliciteert ende vervolcht aen den prince om remissie te vercrigen van tgeen dat si misdaen mochten hebben doir tinnemen van der stede ende om te vercrigen tregiment van der stede, ende deden grote beloften, ende³⁰⁰ beloofden grote zomme van penningen te geven. Ende hiertoe waren hem seer behulpelic die steden van Dordrecht, van der Goude ende van Scoenhoven, ende onderwonden hem des vele. Die prince willende dat lant in ruste ende vreden setten, nam op selver in persone in Hollant te comen, ende quam omtrent midtvasten in die stede van Breda, denwelken here Engbert, grave van Nassouwen feestlic ende gracioselic ontfing ende tracteerden eerlic ende bequaemlick. Soe quamen dair weder bi hem dye van Leyden ende van Dordrecht om der voorscreven saken willen, ende worden genouch te vreden gestelt ende vercregen horen wille redelic. Op dese tijt lach binnen der stede van Gorichom als castelein here Jan die Jonge, here van Egmont, tegen den aenloop der Gelressen; ende onthilt bi hem die ballingen van Dordrecht van der Cabelljaus partije. So worden op een tijt den voorscreven here Jan van Egmont anghebrocht dat Adriaen Jans zoen, scout van Dordrecht, enige contumelieuse ende scandelicke woorden gesproken hadde opten here van Egmont voorscreven. Doe ontboet hem die here van Egmondt wederom, dat hi sine stede wel bewaren soude, want hi was in meninge tot Dordrecht te comen bi sconen dage ende niet bi nachte, ende doen hem reden geven van datgheen dat hi van hem ghesproken hadde; dwelcke hi niet en achte ende liet de stede al te qualic-

300 naar C [beloften]; ontbr. AB.

[p. 382r]

ker ombewaert. Soe is dan here Jan van Egmondt mitten ballinghen van Dordrecht tscepe ghegaen opten sesten dach van aprille, ende is des smarghens te VII uren ghecomen voir die stede van Dordrecht; ende dye scout was op dien tijt an dye Waterpoort ende vraechde den enen scipper ghenoemt Jan Theus zoen wat hy brochte. Ende sprack: 'Heer scout, allerley goet dat ick haest lossen sal.' Ende die scout in die stede ghegaen wesende, ghinghen si alle ghelijck uuten scepen, wel getuycht ende geharnast ter stadtwert in. Dye overste van der stede dit vernemende, vielen terstont int harnas ende quamen den anderen teghen; ende dair gheviel een scarpe scermutsinghe tusschen beyden partien. Ende int vechten sloech here Jan van Egmont mit hulp sijnre vrienden dye by hem quamen den onderscout doot ende Gijelis Aerians soen, burgermeester; dye andere, dit siende, namen dye vlucht ende weken achterwerts. Doen sandt heer Jan van Egmont terstont een bode aen here Philips, die bastert cappetein van Rotterdamme, dat hi hem senden wilde snellicken CCC ofte CCCC knechten; van welken tidinghe die bastert seer verwonderde van sulken vromen daet, ende sandt hem volnae alle dye knechten die hi hadde. Van welker toecoemst heer Jan van Egmondt seer verblijt was ende gestarct, ende mits deser hulpe ving hi omtrent CC poorters van der Hoecxs partie, onder diewelke dat oeck ghevanghen wert Adriaen Jans zoen, die scout van Dordrecht. Dese dinghen dus ghesciet wesende, verhieven hem seer die Cabbeljaus ende grepen enen moet; mer die Hoeckx waren mit allen seer versleghen ende desperaet. Ende die Ghelresse begonnen oeck alsdoen wat te besaten ende deden so veel quaets niet als si te voren wel ghedaen hadden, want die stede van Lederdam wert overghegeven in handen van joncheer Jasper van Culenburch voir alsulke scade als hi hadde, mits sine vangenisse in Francrijck; ende dit doir consent ende believen van den prince. Mer niet lange dairna resigneerde ende overgaf dese joncheer Jasper van Culenburch die stede van Lederdam den heer van Egmont.