Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die here van der Vere die stathouder mit groot volck van wapenen in Den Haghe quam.
Dat XXIII capitel.

Die here van der Vere, die stathouder, vernemende, dat zijn dienres van den hove van Hollant verdreven waren ende dat hem groot scade gedaen was an sine goeden, die hy op thof staende hadde van cleynoden, juwelen ende ander dinghen, die hem beroeft ende benomen waren, ende dat si dat voorscreven hof mit geweldiger hant ghewonnen hadden ende ingenomen; so dede hij terstont vergaderen veel volcs²⁸² van wapenen om dairmede in Den Hage te trecken, ende zijn goeden, die dair noch gebleven waren, vandaen te halen ende die tot andere plecken ende steden te brengen. Ende hadde op die tijt vergadert wel omtrent VII M man uut Zuyt-Hollant, uut dat Sticht van Uutrecht ende uut die stede van Dordrecht, Goude, Scoenhoven, dair de princepaelste of waren dye stathouder selver; heer Jan, burchgrave van Montfoorde; heer Reijer van Bruechusen; heer Jan van Jaersvelt, ridderen; Jan van Naeldwijc; Gherrit van Poelgheest; Jan van Vliet; Walraven ende Henryc, basterden van Bredenrode; Jorijs, des domproest bastert zoen van Bredenrode; Jan van Heemsteden; Jan van Dronghen; Otte van Botlant; Willem van der Goude, sciltknapen, met meer andere; ende quamen

282 vocls AB.

[p. 377v]

die Mase neder tot Vlaerdinghen, ende soe voert tot sGravensande ende Naeldwijck. Ende deden dair comen alle die lantluden dair omtrent gheseten mit hoir waghenen ende paerden om dit volck te voeren. Dye van Delf dit vernemende, sonden twe notabelen mannen ende poorteren van horen steden, als Gherrit van Nyevelt ende Cornelis van Dorp totten stadthouder, ende maecten vrede mit hem, ende lieten alle dit volc binnen ende buten hoir stede passeren boven beloftenissen ende besegheltheden dye si mit anderen edelen ende steden ghemaect hadden. Omtrent den avont is dese tidinge in Den Haghe ghecomen. Dye heren van Egmont ende Wassenner over maeltijt sittende ende vernemende dat si so na Den Haghe waren, stonden si alle roekeloes op ende ruymden Den Haghe, als heer Phillips van Wassennaer; heer Florijs van Cortgeen; heer Claes van Reimerswale; heer Lodewijck van Scenghen; heer Jan van Cats, ridderen, ende Lievijn van Cats. Dese toghen binnen Delft. Here Jan van Egmont ende heer Jan van Wassennaer, baenreheren, toghen binnen Leyden. Ende ruymden alle Den Haghe dye van der Cabbeljauscher partijen waren, ende en dorstens dair niet onthouden. Des anderen daghes dairna, ende was opter Apostelen Sceydinghendach na middage, quam die stathouder mit alle dit volck in Den Haghe, ende hy ghing logieren op dat hof. Die heer van Montfoerde nam sijn logijs int huys tot Egmont, ende stack dair sijn wimpel uut; heer Reijer van Bruechusen ghing int huys van den grave van Oestervant, dwelc heer Reynolt van Bredenrode toe te behoren plach. Binnen dese tiden dat die stathouder in Den Haghe lach, sijnder enyghe vermetele ende quaetwillighe gheweest van der Hoecxs partije, ende quamen mit groten hopen voir der Cabbeljauscher husingen ende woningen, als heer Willem Ruychrocxs, ridder Franc Ruychrocxs, meester Jan Wandel; Tijelman Oem; Jan Oem; Willem die bastert van Sweten ende voert meer andere husen, ende sloegen alle de glasen uut ende voert alle datter in den huse was, ende deden grote scade, ende leefden niet al te eerlick. Die stathouder heeft alle sijn goet van cleynoden, juwelen ende anders dat hi daer noch vandt, doen te samen packen ende dede dat brenghen by sine ghetruwe dienres tot andere sekere plaetsen. Een wijl tijts dairnae liet dye stathouder sijn volck wederom keren, ende hi is ghetoghen binnen die stede van Rotterdamme, ende heeft dair sijn consistorie ende thoff van rechte geset ende ordineert, opdat hy dair te vrijer ende te rustliker soude moghen bliven sitten. Mer weinich van den raetsluden sijn by hem daer ghecomen, want dat meeste deel was van der Cabbeljauscher partije. Als nu dit die gheweken heren van der Cabbeljauscher partijen vernamen, dat die stathouder mit alle sijn volc weder uuten Haghe was ghetoghen, quamen si allegader weder in Den Haghe, ende toghen oec in den husinghen ende woninghen van den Hoecxs partije, slaende dye glasen uut ende voert alle dat si vonden aen stucken, ende deden na als hem voir ghedaen was. Ende als die stathouder dus een wijl tijts binnen Rotterdamme gheleghen hadde, hebbende tot sinen wille meest alle dye steden van Hollant, behalven Leyden, Haerlem ende Amsterdamme, ende dat hi sach dat hi die partijen nyet en moechte doen cesseren ende ter neder legghen, heeft hij dye stede bevolen te bewaren Jorijs de bastert van Bredenrode, mit de van Dordrecht ende van der Goude, ende is gevaren mit alle zijn huysghesin²⁸³ ende goeden in zijn eyghen²⁸⁴ stede van der Vere in Walcheren, want hi was een goedertieren ende sachtmoedich man van herten, dye geen ongevoechten verdragen mochte²⁸⁵.

283 huysgehsin AB.

284 ghen AB.

285 mocte AB.