Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den oerloge datter op stont tusscen tlant van Ghelre ende tlant van Hollandt.
Dat XIX capitel.

Hierna in den Vasten waren enige visscers uut Aemstelredamme, legghende op dye Zuderzee, die scade deden sommige visschers van der stede van Harderwijck. Ende als si dat nu tweemael gedaen hadden, tasten die visschers van Harderwijck weder toe, ende deden hen dyergelijken, waerom die visscers clachtich quamen an die overste van Amstelredam, dat men hen scade gedaen hadde. Nyet al te lanc hierna quam een groot scip van Harderwijck mit veel goets gheladen, leggende voer die stede van Enchusen²⁷⁵. Die van Amstelredam dit vernemende, bereyden terstont een deel lichts geselscaps, dye tot alle boesheit geneycht sijn; ende namen haer baerdsen ende andere scepen, ende roeyden snelliken tot Enchusen, ende namen dat schip mit ghewelt uuter haven, ende brochtent tot Amstelredam. Dit siende die poorteren van Enchusen, vielen terstont oec in haer baerdsen ende roeyscuten, willende bevrien ende bescermen die havene van hore stede, ende achtervolchden die ander. Doe se sagen dat si dus snellic vervolcht worden, namen si cleine scuytges, ende roeyden alle hoer best na die steden van Edam. Dye Enchusers roeyden se na alle hoer macht, roepende dattet zeerovers ende diefs waren, also, dat die Edammers ende Enchusers mit malcanderen toevielen, ende sloegen in den hoep, datter vele doot bleef. Arm ende benen sloegen si hem of, ende worpender vele overboert, die verdroncken, ende namender oec vele gevangen, dye si tot Enchusen brochten. Ende doe stonter een groot oerloge op tusscen tlant van Hollant ende Ghelrelant, om die sake voorscreven; want die Gelresse den Hollanderen vele scaden deden uuter steden van Harderwijc ende van der Elburch, ende bisonder den coopluden, varende in de marcten tot Deventer. Omtrent dese tijt cregen die Gelresse met

275 Enchuien AB.

[p. 375r]

cloecheden die stede van Lederdam; ende here Jan van Cats, ridder, siende die Ghelresse in die stede van Lederdam, wert vervaert ende liep mit al den Hollanders van der slote ende lieten tledich staen, ende die Gelressen nament in, sonder slach of stoot. Ende uut dese stede ende slot van Lederdam deden die Gelressen mit horen capitein genoemt Claes van Haeften grote scade int lant van Hollant van roven ende branden, ende nam grote verdingen²⁷⁶ van den dorpen ende brantscattingen. Ende dat oerloge stont omtrent II jaer, ende was den Gelressen ende den Hollanders sere scadelic ende hinderlick. Ende want ( eylacen! ( dat lant van Hollant overmits den II partyen ende twisten ende twedracht bestont te staen ende gedeelt te werden, dat dene partie was goet Gelres ende dander niet, om dwelke die Gelresse van den Hollanders niet verwonnen noch tonderbracht en mochten worden; want God sprect in den Heiligen Evangelie: Alle rijken ende landen in hemselven gedeylt ende vaneen versceyden, sullen verwoest ende destrueert worden.

276 de d van verdingen is beschadigd in AB.