Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat dat lant van Ghelre weder ofviel van der obediencie des huys van Bourgondyen ende rebelleerden, ende hoe des heren van Egmondt twee sonen ghevanghen worden.
Dat XVII capitel.

Also voren geseyt is, dat hertoge Kaerle van Bourgondien tlant van Ghelre ghecocht hadde ende betaelt tegen hertoge Aernt van Ghelre ende dat mitten swaerde conquesteert ende gewonnen, ende had se tot sijnder obediencie gebrocht, ende hadden hem ontfangen ende gehult voer enen hertoge van Ghelre ende grave van Zutphen, so waren si nu na der doot des voorscreven²⁷⁴ hertoge Kaerls van anderen opinie geworden, ende keerden hem van der obediencye des huys van Bourgondien ende bleven in desen rebellicheden staen totdat hertoge Maximiliaen getrouwet hadde vrouwe Maria; ende van desen rebelle waren die principale de stede van Nimmagen ende van Zutphen mit horen adherenten ende contreyen. Ende also here Adolf van Ghelre voer die stede van Doernic doot gebleven was ende sine kinderen noch gehouden worden int hof van Bourgondyen, so hebben si bi hem doen comen joncfrouwe Katherine van Ghelre, here Adolfs suster, omdat si mitten steden dat lant soude helpen regieren. Nu so hadde here Willem van Egmont, die binnen Aernhem lach, bestelt dat heere Jan van Cats soude wesen castelleyn van der stede van Lederdam om den Ghelressen in dat eynde van de lande te resisteren ende wederstaen. Ende dese here Willem van Egmont mitten hertoge Jan van Cleve arbeyden sere, dat die Gelressen comen mochten onder subjectie des hertoechs Maximiliaens. Daerna ist gheboert opten XXII dach van aprille, int jaer van LXXVIII, dat here Frederijc van Yselstein ende joncheer Willem

274 voosreven AB.

[p. 374r]

van Egmont, des heren sonen van Egmont, met een deel hoerre familie ende dienres quamen omtrent Nimmagen, die se vingen ende brochten se gevangen binnen Nimmagen; ende bleven dair sitten omtrent III jaer lanc, ende worden binnen dien tiden dicwils grote tormenten angedaen, ende hadden een van hore dienres, genoemt Adriaen Hack, doen onthoefden ende quartieren als een verrader. Op dese tijt hadden die Ghelressen bi hem int lant van Ghelre doen comen hertoghe Frederijc van Bruynswijc, ende wouden hem te wive gegeven hebben joncfrouwe Catrine van Ghelre; mer si en woude hem niet; ende maecten hem voecht ende momber des lants van Ghelre ende Zutphen. Ende hi quam mit groter geruchte van trompetten ende trommelen, mit groot volc binnen Nimmagen, ende nam den last an, ende stelde hem dat lant te defenderen ende bescermen voer alle vianden ende rebellen; ende ghinc legghen voer die stede van Aernhem om here Willem van Egmont daeruut te verdriven, mer hij en mochtes niet volbrengen, ende brac cortelic op van den belegge. Daerna bestonden dye Ghelresse op te rysen tegen die van Den Bosch mit horen quartier, diewelken den Gheldersen wederstonden; want si togen over int lant van Ghelre mit groter macht, ende deden dair vele scaden, rovende ende brandende, ende belagen die stede van den Grave, ende hadden een groot swaer blochuys op doen slaen, dat se hem benamen datter gheen vitaelge noch provande binnen comen mochte, sodat se die stede mitten slote opgaven. Hertoge Frederic van Bruynswijc dede oec vele scaden int lant van Brabant ende Cleve, barnende ende rovende vele dorpen; ende nam grote sware brantscattingen ende verdingen van den dorpe ende ondersaten int quartier van Den Bossche ende in den landen van Cleve, want si der Gelressen vianden mede waren. Ende als die prince Maximiliaen weder uut Henegouwen ghecomen was, heeft hi vele capiteinen ende knechten geordineert te trecken int lant van Ghelre. Ende hi quam selver tot Remonde, ende werdt daer ingelaten, ontfangen ende gehult, ende in allen anderen plecken daer omtrent. Dat gedaen sijnde, reysde hi weder in Vlaenderen tot Ghent, om nootlike saken te expedieren. Ende hierenbinnen wert hertoch Frederic van Bruynswijc sieck, ende reysde wederom in sine landen. Ende doe namen die Ghelressen tot horen voecht ende momber here Henric van Swartsenburch, bisscop van Munster. Ende hi quam int lant van Ghelre ende nam den last van den landen an.