Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoge Maximiliaen ridder geslagen wert, ende van den oerloch dat hi annam tegen de Fransen, ende hoe die princesse gewan een soen.
Capitel XVI.

Als die hoechgeboren prince Maximiliaen in allen steden der landen van Hollant, Zelant, Vrieslant, mit groter triumphen ende feesten voer een graef ende here van den landen als man ende voecht sijnre huysvrouwen ontfangen ende gehult was, is hi wedergekeert in Vlaenderen, in die stat van Brugge. Daer wesende heeft hi opten eersten dach van mey doen vergaderen alle die princen

[p. 373v]

graven, banroeden, ridderen ende edelen sijnre landen ende provincien, ende heeft mit hen tracteert om te resisteren ende wederstaen den coninc van Francrijc, die dagelicxs sine landen ende steden vele scaden ende moyenisse dede. Ende also dese edele prince noch gheen ridder en was, so heeft men alle dinc bereet gemaect om hem ridder te maken eer dat hi op dye Franssen oerlogen woude. Ende als nu alle dingen daertoe dienende bereit waren mit groter costlicheit ende chyerheit, quam here Adolf van Cleve, here van Ravenstein, ende ordineerde ende creeerde den hertoghe ridder met enen slage in sinen halse mit een costelick swaert gevende, in tegenwoerdicheit alle der princen ende heren der landen. Ende als hi ridder gemaect was, hief hi weder op die Oerden van den Toysen oft Gulden Vliese, die die doerluchtige prince hertoge Kaerle te draghen plach, ende hinc se om sinen hals. Ende hilt doen openbaer hof ende feeste des selven Oerdens, renoverende ende vernyewende die voorscreven Oerde, ende wert angenomen in derselver Oerde die here van der Vere, stathouder van Hollant, Zeelant ende Vrieslant, ende heere Willem van Egmont, wilen hertoge Aernts broeder van Ghelre. Dese feesten ende triumphe van den Oerden des Toeysoens gedurende, hilt men een vrolic hof mit steken ende tornyeren ende andere ridderlike oeffeningen in groter vrolicheit ende bliscappen. Dese feeste voleynt wesende, heeft die prince groot volc van wapenen vergadert, ende heeft hem bereyt om den Franssen uut sinen landen te verdriven ende te keren. Die Franssen die in Henegouwen vele steden ende sloten inne gecregen hadden ende tot noch toe besaten, dit vernemende, ruymden terstont die plaetsen ende en dorstens daer niet onthouden. Ende die prince quam in Henegouwen, ende creech alle dat lant weder onder sine subjectie ende onderdanicheit. Ende creech oec meer ander steden ende plecken in van den Franssen, ende hadde vele scermutsingen ende mangelingen tegen malcanderen, dair hi dicwils victorie of hadde. In desen selven jare van LXXVIII, opten XXII dach des maents van junio, wert in der stat van Brugge geboren die edele prince ende eerste sone des hertoechs Maximiliaen ende vrouwe Marie, ende wert na sine overoudevader genoemt Phillips, van denwelken alle die landen sere verblijt waren, lovende ende danckende God van hemelrijc mit processien ende vierlicke feesten; ende in allen steden ende plaetsen worden grote vieren ghemaect ende vele bliscappen ende vroechden ghetoont.