Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die rebellicheit des heren van Scagen, ende hoe hi gevangen wert ende starf.
Dat XV capitel.

In den jare M CCCC LXXVII so wert mit vollen gerechte verwonnen here Aelbrecht, die anderde here van Scagen, van rebelheyt tegen sinen here, den grave van Hollant, ende van der violencie ende ghewelden die hi gedaen hadde teghen sine broeders Jan ende Willem, ende meer andere goede, treflike mannen tot vele plaetsen in Hollant geseten, ende wert condempneert ende gewesen mit rechte enen ygelic te voldoen. Mer here Aelbrecht van Scagen, ridder, en achte hier niet op ende bleef op sijn huys tot Scagen leggen, ende en woude niemant niet geven noch voldoen; waerom dat die steden van Hollant, groot ende clein, concludeerden ende sloten te samen, dat si hem op sijn huys beleggen wouden. Soe sijn dan gecomen die here van der Vere, de stathouder van Hollant, Zeelant ende Vrieslandt, heere Phillips van Wassenaer, here van Voerburch; here Jan van Cruningen, here van Pamelen, mit meer andere heren, ridderen ende edelen van Hollant, hebbende mit hem vele cloecke mannen uut Haerlem, Leyden, Delft, Amstelredam ende Alcmer. Dese altesamen vergadert wesende tot Egmondt ende Scoerl op Sinte Barbaren dach, togen voert voer dat huys tot Scagen. Here Aelbrecht van Scagen, siende dit grote volck voer sijn huys, ende genen macht en hadde die te wederstaen, ghinc hi van den huyse ende gaf hem in genaden ende handen des stathouders, ende wert gevangen gebrocht in Den Hage ende in hoesscher hoede ende vangenissen geset, ende daerin te bliven ter tijt toe dat dye creditoren ende sculdeners betaelt soude wesen. Ten lesten wert hi gevangen gebrocht op tslot tot Medemblic, ende daer starf hi int jaer M CCCC LXXX, omtrent Sinte Bertelmeesdach, ende wert tot Scagen begraven. Ende liet niet dan een enige dochter after, ghenoemt Josine, die te man had Wouter van Egmont, here van Suetermeer; dairna nam si te man Joest, here Adriaen, bastertsoen van Borselen, here van Brigdam, dye te wive hadde vrouwe Anne, hertoge Phillips bastertdochter van Borgondien.