Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoge Maximiliaen ontfangen ende gehult wert in allen steden der landen voorscreven.
Dat XIIII capitel.

Dese Maximiliaen was aertshertoghe van Oestenrijc, hertoge van Carinthen, van Crayn, van Stiryen, ende grave van Tyrole, des doerluchtigen keyser Frederijcs die Derde sijn lieven enigen soen; ende was een jongelinc van XVIII jaren, scoen ende bequaem, mit vele doechtlike gracien begavet, als hi troude ende tot eenre huysvrouwe nam vrouwe Marie, hertoge Kaerls enige dochter, hertoechinne van Bourgondien, van Lottringen, van Brabant²⁷³, van Limburch, van Lutsenburch ende van Ghelre, gravinne van Bourgondyen, van Artoys, van Vlaenderen, van Henegouwen, van Hollant, van Zeelant, van Namen ende van

273 Brakant AB.

[p. 373r]

Zutphen, vrouwe van Vrieslant, van Mechelen, van Salins, ende marcgraefinne des Heiligen Rijcs. Ende aldus wert hi here van XVIII landen uuten name sijnre vrouwen, behalven die V landen ende provincien van sijn selfs wegen. Dese hertoge Maximiliaen was geboren int jaer M CCCC LIX. Sijn moeder was coninc Jans dochter van Portegale, ende was van hertoge Phillips van Bourgondien uuter fonten geheven bi handen meester Anthonis Hanneron, die op die tijt van den voornoemde hertoge Phillips als ambassiaet gesonnen was totten keiser. Waerom dat die hertoge desen voorscreven meester Anthonis Hanneron, proest van Sinte Donaes tot Brugge uuter vangenissen van Vilvoerden verloste, ende nam hem in genaden. Desgeliken wert oec die prothonotarius van Clungni uuter vangenisse tot Ghent verlost; mer dese, terstont als hi uuter vangenissen was, reet over bi den coninc van Francrijc mit here Phillips van Crevecuer, here van Cordes, mitten here van der Rochem ende meer ander, dair die coninc sere mede gestarct was. So heeft dan dye hertoge Maximiliaen sine gracie ende miltheden getoont allen den steden sijnre landen ende provincien, gevende, verlenende ende confirmerende alle die privilegyen, vryheden ende hantvesten die vrouwe Marie, sine huysvrouwe, voer sijnre coemste den steden hore landen ende provincien hadde verleent ende gegeven. Ende heeft den eedt van sine leennen ende vasallen genomen, hem wederom belovende getrouwicheit, als van ouder costumen dat behoert. Ende is gereyst in allen den landen ende provincien, quam oec hier in desen landen van Hollant, Zelant ende Vrieslant, na Paesscen int jaer M CCCC LXXVIII, ende wert gehult ende ontfangen als een man ende voecht der princessen voer enen grave van Hollant, Zeelant ende Vrieslant.